BJP thawhpui dawn loh thu puang nawn

Zoram Peoples Movement (ZPM) Political Affairs Committee (PAC) hruaitute chuan, inthlan hma leh inthlan result puan hnuah ZPM-in BJP an thawhpui dawn loh thu an puang nawn ve leh a; MNF Media & Publicity & IT Monitoring Cell-in 'ZPM leh BJP an thawkho dawn em?' tih thupui hmanga pamphlet copy 1,00,000 an thehdarh chu pawi an tih thu an sawi.

ZPM PAC hruaitute hian nimin khan Aizawl Press Club-ah thuthar thehdarhtute an kâwm a; ZPM Steering Committee vice chairman Rev. Darchungnunga chuan, "ZNP leh MPC-te'n tun hmain BJP-te ṭhian ṭha angin an lo inbe tawh a ni mai thei a, Pu Lal­duhoma pawhin a lo bia a ni mai thei. Mahse, May 2,2018-ah ZPM Steering Committee-in BJP nen an thawhho loh tur thu an pass avang­in, hemi hnuah chuan ZPM angin emaw, a mimal pawhin Pu Lalduhoma'n BJ a be tawh lo. MNF-in an inbiak thu a sawi kha ZPM thutlukna siam hmaa mi vek a ni," a ti.

Rev. Darchungnunga chuan, ZPM Val Upa Council (VUC) pawhin Lalduhoma chu BJP nen an lo inkawm chungchangah fimkhur tak leh chîk takin an kâwm a, rinhlelh zuina tur a awm lo a ni tih hriain, chief ministerial candidate-ah an ruat tih a sawi.

Tuichawng bialah NGO Coordination Committee-in political party tin hnenah Chakma candidate-a dah lo tura an ngen angin, ZPM chuan NGO thu zâwmin candidate an dah lo tih a sawi a, "Mizoramah chuan NGO-te hi ram leh hnam hmangaihtu leh mahni hamṭhatna ngaihtuah loa ram tana inpete tawhhona a nih avangin, an thu leh an zahawmna kan tihhniam chuan, Mizoram leh hnam tan a pawi hle thei dawnah kan ngai a ni," a ti.

Rev. Darchungnunga chuan, "Congress leh MNF-te'n CADC-ah BJP thawhpui an inchuh a, Congress-te an inphal thui zawk avangin Chakma BJP-te nen CADC sorkar an siam a, tun thlengin an sorkar chu a la kal reng a ni," a ti a; MNF-te chu CADC-ah BJP sorkarpui tumtu an nih thu leh, tun thlengin BJP kaihhruai NEDA aṭanga an la inhnuhdawh phal loh thu a sawi bawk.