Term 3-na atan kan sorkar dawn - Congress

MPCC Media chairman leh Congress thupuangtu Lallianchhunga chuan, Congress party chuan kum 10 a sorkar chhungin Mizoram tan nasa takin hmasawnna a thlen nia sawiin, "Minister zingah eirûk thubuai nei an awm lo a, Pathianin kan party min ṭhuahfai a ni," a ti a; Congress mipuite'n phûr takin inthlan an hmachhawn mek a, Congress party chu a zawna term thumna atan an sorkar leh ngei dawn niin a sawi.

Lallianchhunga hian nimin khan Aizawl Press Club-ah thuthar thehdarhtute kâwmin, campaign laiin thu leh hla leh ṭawngkamin pawl tin an inbei a, chanchinbu leh TV-ahte a chhuak ṭhin tih a sawi a, "Kha'ngte kha mimal inhuat nan hmanglo turin pawl tinte kan ngen a, mipuite'n an duh thlanna hmanga vote an thlaknaa a tling apiangte lawm taka pawm ṭheuh turin mi zawng zawng kan ngen bawk," a ti.

Congress thupuangtu chuan mipuiin an thlan chhuah apiang chu lawm taka pawm ṭheuh turin Mizoram mipui a ngen.

Lallianchhunga chuan, nimin tlai khan Mizoram hmun hrang hranga an campaign office-ah campaign kharna inkhawm an hmang tih a sawi a; campaign laia an party thu leh hlate puangzartu chanchinbu mite chungah an lawm thu a sawi bawk.

MPCC Media Chairman chuan, Aizawl Municipal Corporation (AMC)-a MNF kaihhruai sorkar a din tirha Board of Councillor an ṭhutkhawm hmasak berah, tender loha hna a tam thei ang ber an insem theih nan 'Hna reng reng cheng nuai 25 aia tam lo chu tender loh ni se,’ tih an pass niin a sawi a, "Hei hi Financial Rules kalh tlat a ni. Hna cheng nuai 25 aia tlem chu tender lohin MNF councillor-te'n an mi duhsak zawng party worker hnenah an pe a, kum thum kal ta chhung khan hna chi hrang hrang 4,000 chuang tender lohin an sem a ni," a ti.