Nimin tlai dar 5 aṭangin campaign khap a ni

Mizoram sorkar chuan thuchhuah siamin, Representation of Peoples Act, 1951 hnuaia Section 126 in a phut angin vote thlak hun tawp aṭanga chhiar let a darkar 48 chhung inthlan campaign khap a nih thu a tarlang. Campaign hi nimin tlai dar 4 aṭanga November tlai dar 5 thleng khap a ni.

Sorkar thuchhuah tarlan danin, khapna thuchhuah in a huam chhungah hian Model Code of Conduct bawh­chhiatna a awm chuan a bialtu Returning Officers te hnenah leh Election Control Room number 2316719/2317717 te engtiklai pawhin thlen theih a ni a,, hei bakah hian cVIGIL mobile application kaltlangin complaint thehluh theih a ni a (cVIGIL apps hi Google Playsore atang a download theih a ni).

Complaint lutte bawh zui tur hian constituency tinah Flying Squad leh Static Surveillance Team te engtiklai pawh a chechhuak turin an inring reng a ni. Thupek zawm lote chu Section 126 of Representation of Peoples Act, 1951 hnuaiah pawisa chawitir emaw, kum hnih thleng jail tan tir emaw, a pahnih emaw a hrem theih an ni.

Khapna thupek zawm turte :
1) Khapna hun in a huam chhungah hian political party hruaitu, party member-te, inthlan campaigner zawng zawngte chu vote an neihna constituency ni loah an awm phal ani lo. Thupek kengkawhtu police-te pawh hotel, guest house etc. ah election campaigner, constituency pawn lam ami te an awm leh awm loh vil reng a, thupek zawm lote chu an vote neihna constituency lama kaltir tura hriattir an ni.
2) Television, radio leh newspaper-ahte inthlan campaign thu leh hla, voter-te rilru hneh thei thil reng reng puanzar khap tlat a ni. Hemi hun chhunga bulk SMS, Interactive Voice Response System (IVRS) leh social media kaltlanga advertisement tichhuak duh chuan generalparty propaganda anih chuan State-Level Media Certification and Monitoring Committee hnen aṭang phalna an lak a ngai a, candidate te fakna anih chuan an dinna constituency awmna District Media Certification and Monitoring Committee hnen atang phalna an la tur a ni.
3) Khapna in a huam chhungah hian vantlang aurinna hmanga inthlan campaign thu leh hla voter-te rilru hneh thei thil puan phal a ni lo.
4) Khapna in a huamchhungah hian musical concert, vantlang inkhawm, kawngzawh leh voter te hip thei thildang engmah huaihawt phal a ni loa, television leh radio-ahte sawihona (panel discussion) leh inthlan thlirlawkna ang chi party leh candidate-tu emaw hlawkpui theih tur thil tihchhuah khap a ni bawk.
5) Vote thlak ni ah candidate, candidate agent leh party worker-ten phalna pek sa lirthei pakhat ṭheuh bak an hmang thiang loa, heng lirtheiahte hian driver telin mi panga aia tam chuan phal a ni lo. Candidate-te constituency dangah an awm anih chuan midangin a motor an lo hman phal a ni lo.
6) Polling station aṭanga metre 100 huamchhungah voter-te thlem leh biak tlawn phal a ni loa, mobile phone/cordless phone pawh inthlan buaipuitu official-te bakin hman phal a ni lo.
7) Zu in khapna thu sorkarin alo tihchhuah tawh chu khawng taka kalpui ani ang.