Polling party-te an chhuak ṭan

Naktuka Mizoram Legislative Assembly inthlanpui neih tura tur polling party eng emaw zat chuan nimin khan an district headquarters chhuahsanin an duty-na tur khua an pa a; nimina chhuak velo zawng chu vawiinah an chhuak ve leh ang.

Polling party zinga nimina chhuakte chu hmun hla deuha duty turte niin, polling party 206 an chhuak a, chu'ng zingah chuan Aizawl district-ah Tuivawl leh Chalfilh biala duty tur te, Mamit district-ah polling station pali, Lunglei district-a khaw hla zual, Lawngtlai district leh Siaha district-a khaw hla leh kal harsa zualte a tel. Vawiinah polling party 962 an chhuak leh dawn a ni.

Lawngtlai district-ah chuan nimina polling party chhuakte chu polling station 59 awmna Tuichawng biala polling party 59, polling station 68 awmna Lawng­tlai West biala duty tur polling party 32 leh, polling station 34 awmna Lawngtlai East biala duty tur polling party 13-te an ni. Lawngtlai West-a duty tur polling party 36 leh Lawngtlai East-a duty tur polling party 21 dangte chu vawiinah an chhuak ang.