MJA-in general conference an hmang ; President atan C Lalrambuatsaiha thlan a ni

Mizoram Journalist Association (MJA) chuan nimin khan Dawrpui Multipurpose Centre-ah general conference vawi 48-na an hmang a, Assembly speaker Lalrinliana Sailo in a hmanpui. Chawhnu lamah kum 2022-2024 chhunga MJA hruaitu tur thlan a ni a, president-ah C Lalrambuatsaiha, The Aizawl Post thlan a ni.

MJA vice president Lalremsiama kaih­hruai inkhawmah Speaker chuan, mi tam takin Mizoram a chhe leilet der anga an sawi chu a dik tawk loa a hriat thu sawiin, "Ṭhangtharte leh mi ṭhahnemngaite tihnual thei khawpa kan ram chhe vek tawh anga sawi hi a dik lo. State hrang hrangah ka kal ve nual tawh a, kan ram ṭhan dan hi a chhe em em lo. Hmasawnna tur kan nei tih erawh a dik," a ti.

Lalrinliana Sailo chuan Reserve Bank of India-in state-te dinhmun a tehnaah hmarchhakah Mizoram chuan Sikkim chiah a tluk lo tih sawiin, "He ram hi kan chenna a ni a, kan la cheng zel dawn. A ṭhat leh ṭhat loah mawhphurhna kan nei. Kan ram ṭhatna atana che chhuakin, a ṭhalaiah infak i ching ang u," tiin, journalist-te chu midangte a ṭhalai kawhhmuh theitu an nih thu a sawi.

Speaker chuan social media-in min run mek nia a hriat thu sawiin, "Sulhnu ṭha lo tak Zofa lokal zel turah a thlen ka hlau. Mahni hming pawh ti lang ngam loin thil an ti ṭhin. Zorama a ni lo zawnga her tur veng turin MJA-te in pawimawh. Journalist dik tak chuan a thuchhuah tur a uluk em em ṭhin. Social media-a fimkhur lo tak takte avangin thil ṭha lo a thleng ṭhin," a ti.

MJA president Zonunsanga Khiangte chuan MJA member-te inpumkhatna chu pawl dang tan entawntlak nia a hriat thu sawiin, "Hna thuhmun thawk kan nih avangin in ngainat pawh kan in ngaina," a ti a, MJA chu NGO a nih loh thu a sawi.

Covid-19 in MJA member-te pawh a kalkân bik loh thu sawiin MJA President chuan, "MJA member hri kai hi 46 kan awm ve tawh a, member 192 aṭanga chhutin kan positivity rate hi 23.95% a ni. Ni hnih/thum chhung vel oxygen pek ngai tlema zâwng kan awm tih loh chu ICU luhpui ngai kan awm lo. Pathianin min awmpuizia leh, kan hna hi a rawngbawlnaah min pawmsakzia a chiang âwm e," a ti.

Chawhnu lamah hruaitu thar thlan leh rorel inkhawm neih niin, kum 2022-2024 chhunga MJA hruaitu atan president-ah C Lalrambuatsaiha (The Aizawl Post), vice president-ah Lalremsiama (Zawlkhawpui) leh treasurer-ah C Lalhmachhuana (Youth Herald) te thlan an ni.

MJA khawmpuiah hian official resolution 'Journalist pension pe tura Mizoram sorkarin hma a la mek hi lawmawm kan ti a. A rang lama tihhlawhtlin a nih theih nan chak taka hma la zel turin sorkar kan ngen a ni,' tih an pawm.