Sainik Board ṭhukhawm

Mizoram Rajya Sainik Board (MRSB) thuṭ­khawm vawi 17-na chu nimin khan Raj Bhavan Durbar Hall-ah an president Dr Hari Babu Kambhampati, Governor hoin neih a ni a, MRSB vice president Zoramthanga, chief minister pawh a tel.

Governor chuan World War II veteran leh World War II sipaiin a thihsan hmeithai chhawm­­dawlna chu Rs 1,200 leh Rs 1,000 aṭangin Rs 2,400 leh Rs 2,000-ah Mizo­ram sorkarin a tihsan thu a sawi a, "Tunah hian hetianga chhawmdawlna dawngtu veteran 33 leh hmeithai 369 an awm mek a, 2nd Assam Regiment a ataka sipai lo ṭang ṭhin, tuna taksa lama rual ban ta lo mi parukte pawh chhawmdawl chhunzawm niin Rs 1,200 an dawn ṭhin chu Rs 2,400-ah tihsan sak a ni," a ti a, ex-servicemen leh sipai in an thihsan hmeithaite damdawi-ina an inenkawlna chung changte a tarlang.

Chief minister Zoram­­thanga chuan Mizo­ram­ ramri venhimna atan Mizo an ṭhat ber thu sawiin,"Hemi chung chang hi Union Home Minister pawh ka sawipui tawh a, Mizorama ex-servicemen-te chu Myan­mar leh Bangladesh hrula ramri venna puitu atan battalion hnih talah siam ni se tiin ngenna ka siam tawh," a ti.