USA-a AIDS veite enkawlna hmun Health Minister-in tlawh
Health minister Dr R Lalthangliana chuan March 23, Nilaini khan AIDS Healthcare Foundation (AHF) Chief of Global Advocacy & Policy Terri Ford-i sawmna angin AHF AIDS Outreach Centre, Fort Worth, Texas, USA a tlawh a; AIDS veite enkawlna hmun leh hmanrua changtlung tak takte chu Mizoram tan hman ve theih dan awm se a duh thu a sawi.
Dr R Lalthlangliana hian Centre-a AIDS veite tana hma an lakna chi hrang hrang - AIDS veite tana awlsam zawka damdawi zawrhna te, AIDS veite tana dental clinics an neih te, AIDS vei harsa tak takte tana a thlawna ei leh in tur an pekna te, AIDS vei rilru hahte tana councelling centre hawn a nih dan te, AIDS veite tana health insurance ryan white leh AIDS drugs Assistance Programme an kalpui dan te, AIDS kher lo pawh STD (Sexually Tranmitted Diseases) leh a kaihhnawih dang veite an enkawl dan te, LAB-CORB - AIDS leh thil dang chi hrang hrang an test-na hmun te a tlawh.
Dr Thangtea chuan AIDS veite enkawlna hmun leh hmanrua changtlung tak tak te hi Mizoram tan pawh hman ve theih dan awm se a duh thu a sawi a; AHF hotute chuan a theih ang ang a Mizoram tana theihtawp chhuah an tum thu an lo hrilh tih sorkar thuchhuakin a tarlang.
Health Minister hian Texas State Capital Dallas-a HAHF Healthcare Centre leh Dallas Market Centre (Access and Information Network) te a tlawh nghal a; Centre hotute nen Mizoram nena thawhho dan tur an sawiho a ni. Dallas County judge Clay Lewis Jenkins chuan HIV/AIDS dona kawnga Health Minister hmalakna chhuanawm a tih zia lantir nan Proclamation Certificate a hlan a ni.
Minister hi Central Mizo Society of America treasurer Lalmuanpuii bakah Ngurmawii Sailo leh Dr Vanlalchhanhima Ralte ten an ṭawiawm a ni.