KHAWTHLIR
Raltlante Dan zirtir
Serchhip DC pisa chuan nimin khan Serchhip Chhim Venga Lalpuithanga Hall-ah Myanmar aṭanga raltlan Serchhip Chhim Veng, Dinthar leh Darnam Venga chengte pualin Capacity Building Programme an buatsaih a, an hun hmanpuitu addl. DC Lalmuansanga Ralte chuan raltlante chu mahni khua leh an in leh lo chhuahsan ngai khawpa harsatna an tawk chu pawi a tih thu leh Mizoramah thlamuang taka awm tura an duh thu a hrilh. Raltlante hi Foreginer’s Act, 1946 leh Integrated Child Protection Scheme (ICPS) tih thupuite hmangin an tana hriattur pawimawhte hrilhhriat an ni.
Lawmpuina hlan
Lawngtlai District MJA member-te chuan padma shri dawngtu Lalbiakthanga Pachuau, MJA member chu an chhuanzia leh lawmpuina lantirna atan March 23, 2022 zan khan a chenna inah thilpek an hlan.
Lok Adalat
Mizoram State Legal Services Authority chuan nimin khan an pisa-ah Lok Adalat an nei a, bench pathum buatsaih niin, case chi hrang hrang 56 ngaihtuahin, thubuai 28 chìn fel a ni. Pawisa chungchang thubuai chin fel hlut zawng chu Rs.87,67,333 a ni.
NIELIT-ah police Training zo
Mizoram Police leh National Institute of Electronics & Information Communication (NIELIT), Zuangtui ṭangkawpin Mizoram police hnuaia thawkte tana ni thum awh, 'Beginner Level of Digital Forensic and Cyber Crime Investigation with Hands-On' an buatsaih chu March 24, Nilaini khan khar a ni a, DGP Devesh Chandra Srivastava-in a hmanpui. DGP chuan NIELIT-in Mizoram Police-te tana training an buatsaih chu lawmawm a tih thu leh police tana training-na hmun nghet a nih theih nan thawhho chhunzawm zel a duh thu a sawi.