Thei leh thlai dahṭhat theihna tur hawng

Deputy chief minister Tawnluia chuan nimin khan KVK Khawzawlah nizung chakna hmanga thlai leh thei vawn ṭhat theihna tura ruahman Solar Cold Storage a hawng. Solar Cold Storage-ah hian thlai leh thei metric ton 10 dah theih a ni.

Tawnluia chuan Mizorama Solar Cold Storage hmasa ber tur bunfel a ni thei chu lawmawm a tih thu sawiin, "Science thiamna leh remhriatna tel loin hmasawnna a kal tak tak theih tawh lo a, nakin zelah a la pawimawh deuh deuh dawn," a ti a, storage bun a nih theih nana hmala tute fakawm a tih thu a sawi.

Veterinary, Fishery and Sericulture Board vice chairman C Lalmuanpuia, MLA pawhin thu sawiin,"Science & technology hi hmasawnna rahbi pawimawh tak a ni. Cold storage chhawr ṭangkaitu tur kuthnathawktute tan káwl a êng ṭan a ni," a ti a, ṭhangtharte tana ram nuam, chenna tlak siam tura ṭan lakpuiah kalkhawmte a sawm.

Solar Cold Storage hi Mizoram Science, Technology & Innovation Council (MISTIC) ten a project an siam a, sorkar laipui Department of Science & Technology hnuaia North East Center for Technology Application and Reach (NECTAR) aṭanga hmuh cheng nuai 22 leh MLA Fund Rs 9,00,000 hmanga din a ni. Mizorama thei leh thlai thar chhuah lar zualte vawn ṭhat theih tura ngaih a ni.