Kan party chuan kan ti ang kan tih chu kan ti mai ṭhin - MPCC Vice President

Mizoram Pradesh Congress Committee (MPCC) chuan 'Chhim Hrut Fehchhuah' hun an hman chhunzawm zel a, nimin khan Siaha traffic point-ah vantlang inkhawm buatsaihin MPCC vice president Lal Thanzara chuan an party chuan kan ti ang an tih chu an ti mai ṭhin niin a sawi.

MPCC Vice President chuan, "Rangva kan sem ang kan tih khan tuman an awih lo. Mah se, kan sem mai. Ram buaia kum 20 kan awm hnuah Congress sorkarin thuneihna a ken avangin inremna a awm leh a ni. NLUP cheng nuai 1 kan sem ang kan ti a, kan sem leh mai, dinchhuahpui pawh tam tak an awm a ni," a ti.

Lal Thanzara chuan ṭhat loh theih lohna bawm, sorkar kan siam dawn tia an tlangau thu sawiin "Thutiam hlen ṭhin kan nih angin kan siam leh mai dawn. MNF-in cheng nuai 3 sem an tiam ve a, vawiin thlengin nuai 3 dawng sawi tur an la awm lo. Politics hi dawt sawina tur a ni lo," a ti a, sorkar duh vang ringawta duh duh tiam ringawt tur a ni loh thu a sawi.

Thusawitu dang MPCC treasurer Zodintluanga Ralte chuan Mizoramah rorelna ṭha a awm thei lo nia sawiin, "A chhan chu hruaitu lu ber a dik loh vang a ni. MNF MLA zingah hian mi ṭha tak tak an awm mah se, a lu ber a dik tlat lo. Ṭhat theih miah lohna bawma an awm miau avangin an ṭha hleithei bik lo a ni," a ti.

Lalduhoma chungchang sawiin Zodintluanga chuan, "Kan sawisel ve hlek hian dem kan hlawh ṭhin. Amaherawhchu, amah Pu Lalduhoma ber hi thil zawng zawng sawiseltu a ni zawk. CM ni lai ngei pawh hmai hma a 'not normal a ni' ti a sawikhum duh khawpa rilru hrisel lo a ni," a ti a, party dang chuan an khingpuite mimal chanchin an sawi ve ngai loh thu a sawi.

Zodintluanga chuan 'CM ka nih chuan ka minister leh MLA-te zingah eirukna leh hlemhletna lama mualpho an awm chuan ka ban ang,' ti ngam CM candidate an neih thu sawiin, "Kan danglam nasa hle ang," a ti.