Mizoram sum dinhmun a ṭha lo - ZPM Ṭhalai

ZPM Ṭhalai hruaitute chuan nimin khan an president Malsawmzuala Ralte hoin Aizawl North leh South treasury office an tlawh a, Mizoram sum dinhmun a ṭha lo takzet niin an tarlang.

ZPM Ṭhalai chuan treasury office-a thawktute Mizoram sum dinhmun an sawipui thu sawiin, "Treasury Officer-te kan kawmna aṭangin Mizoram sum dinhmun a ṭha lo takzet tih a hriat theih a ni. Financial year tawp nan hna thawhna hun ni nga bak a awm tawh lo chungin, Aizawl North Treasury-ah nikhata sum pekchhuah theih zat (daily ceiling limit) chu cheng nuai 40 a ni a, Aizawl South Treasury-ah nikhata sum pekchhuah theih zat chu cheng nuai 65 a ni," a ti.

ZPM Ṭhalai tarlan danin, Aizawl South Treasury-ah hian sorkâr hnathawkte GP fund tâng tlingkhawm chu cheng vaibelchhe 28 vel a ni a, bill tâng hi vaibêlchhe 500 vel a awm ni-a chhut a ni. Aizawl North Treasury lamah pawh GP Fund tâng tlingkhawm cheng vaibelchhe 40 vel a awm nia chhut a ni.

Aizawl North leh South Treasury-ah hian kum dang ang lo takin sum khawih chet tur a awm mang lo nia tarlangin ZPM Ṭhalai chuan, "Bill pending tam tak a awm a, kum danga daily ceiling limit sang tak ni thin kha kuminah chuan sum awm loh avângin an ti thei lo a ni. Bill hrim hrim pawh Finance dept. phalna lo chuan pek chhuah theih a nih meuh loh thu dawn a ni. Financial year tawp dawn tawhah pawh nikhata sum pekchhuah theih zat nuai 40 leh nuai 65 chauh a la ni mai hi a mak hle," an ti.