Hripui vei zinga 99.19% enkawl dam an ni tawh

Mizoramah nimin khan tlai dar 5 thlengin Covid-19 vei dam tawh mi 292 chhuahtir an ni a; Mizorama Covid-19 vei 2,23,343 aṭangin mi 2,21,545 (99.19%) enkawl dam an ni tawh.

March 23, Nilaini khan Mizoramah sample 1,780 endik niin Covid-19 vei mi 186 hmuh chhuah a ni. Nimin khan tlai dar 5 thlengin hripui vanga enkawl lai mi 1,120 an la awm a, chu chu positive hmuh tawh zawng zawng aṭangin 0.50% chiah a ni tawh a; nimin khan Covid-19 vangin mi pakhat a thi.

Nilainia Covid-19 vei hmuh thar mi 186-te chu mipa 79 leh hmeichhia 112 an ni a; RT-PCR hmanga hmuh chhuah pali, RAT hmanga hmuh 186 leh FIA hmanga hmuh pakhat niin, TrueNAT hmanga sample endik zingah hri vei an awm lo a; positivity rate chu 10.73% a ni.

IDSP record angin, Mizoramah Covid-19 vei 2,23,343 hmuh chhuah a ni tawh a, mipa 1,04,168 leh hmeichhia 1,19,175 an ni a, mipa aiin hmeichhia 15,007-in an tam zawk. Nimin tlai dar 5 thleng khan mi 2,21,545 (99.19%) chhuahtir an ni tawh a, mi 679 (0.30%) thi tawhin, enkawl mek mi 1,120 (0.50%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,23,152 chu mi 1,000 zelah hripui vei mi 203 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Nimin tlai dar 4:30 khan Neihdengi (84), Hmunsam, Mamit district chu Mamit dedicated covid health centre (DCHC)-ah a thi a, natna dang nei tel a ni. Covid-19 hripui a vei tih March 22, 2022 khan hriat chhuah niin nimin khan DCHC-ah dahluh a ni.