Zu khapna kalpuina tur rules Council of Minister-in a pawm

Council of Minister nimina chief minister Zoramthanga hoa ṭhukhawm chuan, Excise & Narcotics department (END) aṭanga zu khapna kalpuina tura duan, Mizoram Liquor (Prohibition) Draft Rules, 2022 rawtna an pawm.

Vanglaini thudawn danin, END-in MLP Draft Rules, 2022 a thehluhah hian zu leh a kaihhnawih hrim hrim khap ṭha tih a ni a; tun hnaia sawi hlawh tak, wine zawrh phal leh phal loh chungchang tarlan a awm lo.

Wine zawrh phal leh phal loh hi Council of Minister thutlukna siam tura dah a ni a, MLP Rules hi pawm ni mah se, wine zawrh phal a nih dawn leh dawn loh sorkar thuchhuahah tarlan tel a ni lo. Cabinet hian wine siam phal an remti a nih chuan, a zawrh dan tur leh alcohol tel phal zat turah thutlukna an siam tel a ngai dawn a ni.

Grape chíngtute chuan rawtna awm pakhat, alcohol 5% telh chu ṭha an ti lo a, ṭha an tih loh chhan chu - alcohol a tlem lutuk chuan wine chu thla ruk vel bâk a ṭha thei dawn lo. Alcohol tel tur zata an duhthusam chu 14% a ni a, 11% a nih pawhin wine chu a ṭha rei tho tura ngaih a ni.

MLP Rules ngaihtuahtu Committee-ah wine-a alcohol tel tur zata sawi rîk tam ber chu 5%, 11% leh 14% a ni a; Cabinet-in wine siam a remti a nih chuan alcohol tel tur zatah thutlukna an siam ang.

Tarlan tawh angin, wine siam leh zawrh chungchangah hian ràwn an nih angin Mizoram Kohhran Hruaitute Committee leh Central YMA chuan zu lam hrim hrim zawrh ṭha an tih loh thu MLP Rules zir chiangtu committee-ah an thlen a ni.

MLP Rules zir chiangtute'n thutlukna an siam hnu, February 4, 2022 khan Champhai leh Hnahlana grape chíngtu pawl hruaitute chuan chief minister Zoramthanga leh deputy chief minister Tawnluia an hmu a; MLP Rules duan meka wine siam chhuahah alcohol 11% telh phalsak tur leh an wine kawl mekte Mizoram hmun hrang hranga hralhna ngaihtuahpui turin an ngen.

Nimina Council of Minister ṭhukhawm hian Tlabung RD Block leh Kawrtethawveng RD block siam tura rawtna an pawm. Tlabung RD Block thar siâm turah hian Lungsen RD block leh Bunghmun RD block-a khaw/hmun ṭhenkhat lak ṭhen a ni dawn a; Kawrtethawveng RD block chu Zawlnuam RD block aṭanga sah thlak tura ruahman a ni.

MLP Rules leh a kaihhnawih
1) Zu zawrh khapna dan Mizoram (Liquor Prohibition), Act chu March 20, 2019 khan Assembly House-ah pawm a ni.
2) MLP Rules chu December 19, 2019 khan notification hmangin chhuah a ni a, December 19, 2019-ah vêk notification hmangin sût leh a ni.
3) MLP Rules thar duân leh a ni a, Covid-19 avanga Cabinet meeting neih hleih theih a nih loh avangin by circulation-a hman mai rawtna Chief Minister hnenah thawn a ni.
4) MLP Rules chu by-notification hmanga tihchhuah tum ni mah se, December 29, 2020-a CM Zoramthanga hoa Cabinet meeting chuan ennawn leh phawt an rêl. Ennawntu tur Deputy CM kaihhruai committee din a ni.
5) MLP Rules zir chiangtu tur Committee chuan wine siam leh zawrh chu khap ṭha an ti a, Cabinet-ah rawtna thlen an rél.