MNF hi a ral dawn lo - Vanlalzawma

MNF vice president Vanlalzawma chuan nimin khan Mizo Hnam Rúna inkhawmah thu sawiin, "MNF hi party dangte ang kan ni lo a, MNF hi a ral dawn lo," a ti.

Vanlalzawma chuan, "MNF hi a ral mai mai lo ang. Headquarters mite hi báng darh vek mah ila, thingtlang lamah báng ve miah lo tur tam tak an awm. Kan hruaitute zingah party-a nghet tlat tam tak an awm a ni," a ti a; phûnnàwi cháng awm bawk ṭhin mah se, party chhuahsan záwnga khawsa an awm ve lo niin a sawi.

MNF a sorkar leh sorkar loha buai lo tam tak MNF mipui zingah an awm nia sawiin Vanlal­zawma chuan, "Serchhip bialah pawh a lang chiang. Pu Hawla'n kum 20 chhunga a vûrte khan kum hnih hnu lekah an phatsan a, by-election-ah an candidate-in dahkham a cháwi. MNF aṭang chuan kei ni lo, mi dang pawh ding se dahkham an chawi lo ang. Saitual biala Pu Zira a tlin theih chhan chu MNF-a rinawm tlat an tam vang a ni," a ti.

Vanlalzawma chuan, MNF chu thu âwih thei leh ze nei an ni tih sawiin, “Mahni hlâwkna ûma MNF a zuang lut kan ni lo. Kan hnam pasalṭhate pawh kha hlâwkna ûm vanga feh chhuak an ni lo a, ram tana pên chhuak an ni. MNF chu a ṭobul aṭangin mahni hmasiala kal a ni lo,” a ti a; sorkar reng theih a nih loh avangin MNF-ah rinawm tak leh lungrual taka thawhho zel a pawimawh thu a sawi.

MNF vice president dang Lalthlengliana pawhin thu sawiin, Mizo zingah Mizo nationalism leh Indian nationalism a insual reng dawn niin a sawi a, “Mi ṭhenkhat chuan hnam dang party an zawm a ni. MNF chu Mizo hnam tana ding, hnam pasalṭhate pawh thisen luang ral raih khawpa ding ngam an ni,” a ti.

Hetih lai hian, MNF chuan an party zawm tharte lawm luhna inkhawm nimin khan Haulawnga Hausiampa Hall-ah an hmang a; MNF treasurer K Vanlalauva’n khaw pariat aṭangin voter 154-te MNF-ah a lawm lut niin MNF thuchhuah chuan a tarlang.