Sorkar sikulah uniform inang neih rél ; 'Aw nang, kan Lal kan Pathian' tih hla sikulah sa uar tura sikulte ngen rél

Human Resources Development (HRD) Board hotute March 24, Ningania School Education minister Lalchhandama Ralte hoa a pisaa ṭhukhawm chuan sorkar sikulah uniform inang neih ṭha an ti a, sor­kara thlen an rél. Sikul ṭan hmain sikul tinah 'Aw nang, kan Lal kan Pathian' tih hla a tam thei ang bera sa turin sikul tinte ngen an rèl bakah, inkaih­hruainain sikula inkhawm neih a remtih huna kalpui turin an dah.

Lalchhandama Ralte chuan, hripui léng avanga buaina an neih lai pawhin HRD Board-in hna an thawk reng nia sawiin, "HRD Board hmalaknain Covid-19 avanga hna lâk theih loh karah mamawh zual phuhrûk nan Chief Minister hnenah zirtirtu rawih lailâwkna tur dil a ni. Kum 2021-2022 academic session-ah high school zirtirtu 157 lak nan nuai 157 hmuh a ni a, a hnuah indaih lohna nuai 53 hmuh leh a ni," a ti.

School Education Minister sawi danin, kum 2022-23 atan high school zirtirtu 199, middle school zirtirtu 67, primary school zirtirtu 191 bakah, high school exam centre atan LDC 36 leh IV Grade 27 rawih lailâwkna atan cheng nuai 380 ruahman a ni.

HRD Board vice chairman L Thangmawia, MLA chuan, HRD Board hmalaknain Mizo Language Development Board Bill chu Assembly House-ah pawm a ni a, Governor pawmpuina hmuh a nih tawh thu a sawi a, "Official gazette nghah mek a ni," a ti.

L Thangmawia chuan, HRD Board bultumin Online Interna­tional Workshop-cum-Conference on Mathematics Education chu MZU leh University of Guadalajara, Mexico-te nen ṭang tlangin buatsaih a nih thu sawiin, "Mizoram chhunga zirtirtute leh khawvel hmun hrang hranga mite'n an chhim ṭha hle a ni," a ti a; zirtirtute leh zirlaite hman ṭangkai theih tur project chi hrang hrang a kalna tur hmunah thehluh a nih thu a sawi bawk.