Ruihhlo cheng vbc. 101.92 hû hâl a ni

Champhai police-te'n kum 2019-2021 chhunga ruihhlo chi hrang hrang an mante chu High Level Drug Disposal Committee, Mizoramin nimin khan Trinity Hospital-a incinerator-ah an hâl.

Ruihhlo hâl puala inkhawm buatsaihah DGP Devesh Chandra Srivastava chuan, ruihhloin Mizoramah zung a kaih nasat avangin ruihhlo darh zel tur vên chu Mizoram police ngaih pawimawh ber pakhat a nih thu a sawi.

Devesh Chandra Srivastava chuan, "Dan kengkawhtute'n ruihhlo donaa hma an laknaah theihtawp chhuaha thláwp tlat turin Mizo mipui ka sáwm a ni," a ti a; kohhran leh khawtlang hruaitute pawh Mizoram police hmalakna thláwp zel tur leh ruihhlo a rêmtheihna tura nasa zawka ke pên turin a ngen.

Ruihhlo bakah zu leh vaihlo zûna táng ṭhalai naupang tak tak an tam thu sawiin DGP chuan, "India ram state zinga ṭhalai vaihlo bâwiha táng tam berna kan ni hian ṭan lak belh a ngaihzia a tichiang hle. Kan ṭhalaite hmelma chi hrang hrang hi do turin kan ṭan tlàn a ngai. Sikul hawn a nih hunah pawh theihtawp chhuaha zirlaite hnenah thil ṭha lo laka filhim tura zirtirna kan kalpui a ngai dawn a ni," a ti.

Nimina ruihhlo hâlte chu pseudophedrine kg. 238.90, cheng vbc. 8.68 hû leh methaphetamine kg. 30.90, cheng vbc. 93.24 hû a ni a, a vaiin cheng vbc 101.92 hû a ni. Ruihhlo hâlnaah hian Excise Commissioner leh Central YMA hruaitute pawh an tel.