Tualte Water Supply Scheme hawng

NABARD (RIDF-XXV) sum nuai 315.46 hmanga Tualte khuaa nizung châkna hmanga tui lâkna, Water Supply Scheme chu nimin khan Vanhnuailiana Hall-ah deputy chief minister Tawnluia, PHE department enkawltuin a hawng. Tawnluia chuan Khawhaiah cheng vbc. 25 séngin tui lâkna siam thuai tum a nih thu a sawi.

Deputy CM chuan, Tualte Water Supply Scheme chuan ni tina mi pakhat tui mamawh zat tur hisâp ang a pe thei dawn tih sawiin, “In tina tui connection pek tum zawh a ni ṭêp tawh a, JJM, NABARD leh a dangte kaltlangin Tuichang bial chhungah tui lâkna siam zawh deuh vek a ni tawh,” a ti.

SEDP kaltlangin kut hnathawktute tan theihtawp chhuah tum a nih thu sawiin Tawnluia chuan, “A thawhkhat nan Rs 50,000-a bul ṭan tum a ni,” a ti a, Tualte aṭanga Bungzung inkalpawhna siam tum pawh bawhzui zel a nih thu a sawi.

Tualte Water Supply Scheme hi June 23, 2020-ah siam ṭan a ni a, May 31, 2023-a zawh hman tura tih a nih laiin June 15, 2021 khan zawh a ni. Tui connection 196 pek chhuah a ni a, mi pakhatin ni khatah tui litre 55 zel hmang anga chhûtin mi 1,483-te tui mamawh tun aṭanga kum 30 thleng châwm zo tura duan a ni. Ni khatah darkar sarih chhung tui pump thei tur leh ni tin tui litre 61,600 pump thei tura duan a ni bawk.