PM-POSHAN budget 2022-23 Cheng nuai 2,574.69 pawm a ni

State Level Coordination Committee chu chief secretary Renu Sharma kaihhruaiin nimin khan CS conference hall-ah an ṭhukhawm a, sikula chawchhun pekna PM-POSHAN Annual Work Plan & Budget 2022-23 cheng nuai 2,574.69 an pawm.

Ṭhutkhawmah hian kum 2022-23 budget tur - primary school tan cheng nuai 1,522.02 leh middle school tan cheng nuai 1,052.67 an pawm a, a vaiin nuai 2,574.69 a ni. Cheng nuai 2,574.69 zinga nuai 2,078.89 (80.74%) chu sorkar laipui tum tur a ni a, nuai 495.80 (19.26%) chu Mizoram sorkar tum tur a ni.

Sum ruahman dan hi Ministry of Education Project Approval Board-in April 7, 2022-a a thlir hman turin thehluh a ni ang.

Tarlan danin, PM-POSHAN aṭangin sikul 2,495-a naupang 1,43,471 hnenah chawchhun pek a ni a, primary school 1,408 leh middle school 1,087 a ni. Sikul hrang hrangah kitchen garden 1,066 a awm. Covid-19 hripui lèn laiin sikul kai theih ni lo mah se, zirtirtute’n naupangte inah kalin chawchhûn an sem ṭhin.

Ṭhutkhawmah hian School Education secretary Dr Lalzirmawia Chhangte, Lunglei DC Kulothungan A, School Education, Finance, Planning, Health & Family Welfare, Rural Development leh Food, Civil Supplies & Consumer Affairs department hotute leh Food Corporation of India hotute an tel a ni.