Congress-in chiang taka dâwt sawiah Minister Robert Romawia Royte an puh

Mizoram Pradesh Congress Committee (MPCC) chuan minister of state Robert Romawia Royte chu dâwt sawiah an puh a, "Dâwt chiang lutuk kan ram hruaituin mipui a hrilh duh hi vanduaithlak kan ti hle," an ti.

Nimina MPCC thuchhuah chuan, March 21, 2022-a Mizo Hnam Rûna inkhawmah Robert Romawia'n, 'MNF sorkarah leiba a pung lo tih hi Mizoram mipui hian hria se ka duh,' tia a sawi thu leh, 'Congress-in NLUP a kalpui chhung khan kawngpui kháp khat pawh an siam lo,' tia a sawi thu a tarlang a ni.

Ram hruaituin dâwt chiang lutuk mipui a hrilh duh chu vanduaithlak an tih thu sawiin MPCC chuan, "Minister ve meuhin a dik lohzia finfiah leh mai theih an party mipui kal khawm hmaa a sawi hreh lo hi a zahthlak tak zet a, an party mipui a ngaih màwlzia a lantirnaah kan ngai a ni," a ti.

Congress party chuan minister Robert Romawia Royte chu budget bu bih chiang tawh tur leh a thu lâkna RBI data-te en mil turin an chah a, "Kum li âwrh MNF an sorkar chhung hian leibá a pung nasa em em a, cheng vbc. 5,238 laiin a pung hman a ni tih Pu Robert Romawia Royte hian hria se kan duh," tiin, thu dik a sawi ngam lo a nih pawhin, ngawi mai turin an chah.

MPCC tarlan danin, kum 2008-2018 chhung Congress sorkarah Mizoram leibá a pun cháng leh a tlakhniam cháng a awm a, Gross State Domestic Product (GSDP) nena khaikhinin, MNF sorkar hmasa an tlâk kum 2008-a Mizoram leibá chu GSDP aṭanga chhûtin 103.5% a ni a, kum 2018-a Congress sorkar a tlak lai khan 38.9%-ah a tlahniam tawh a ni.

Zoramthanga sorkarah hripui léng chung pawha hna châwl lo anga sawi chu belhchian dâwl lo a nia sawiin MPCC chuan, "PAHOSS-a party mite duhsak nana cheng nuai 100 chuang sem te, SEDP board enkawl nana sum kal raltir te, sorkar hnathawk hlawh a hun taka pek theih lohte leh kum khat chuang health care bill batte bâk sorkarin hmalakna lian tham a nei loah kan ngai," an ti.