Kum 2019 hnuah mi 8 kâng hlum

Fire & Emergency Services, Mizoram chhinchhiah danin, kum 2019 aṭanga March 2022 thleng khan Mizoramah chenna in 178 a kâng a, kângmei chhuakah mi pariat an kâng hlum.

FES chhinchhiah danin, kum 2019 aṭanga kumin March thla thlengin Mizoramah kângmei vawi 607 a chhuak a, chu'ngte chu chenna in kâng 178 leh ram kâng 429 a ni. Kângmei chhuakah hian mi pariat an thih bakah, Rs 1,11,55,09,125 hû bungrua, hmanrua, ran, adt. a kâng chhia/hlum a ni.

Kâng ṭhelh hna thawhnaa thite hriatrengna, Fire Service Week hman dan tur nimin khan Home secretary H Lalengmawia hoin sorkar hotute'n an ngaihtuah a; Fire Service Week chu April 14-20, 2022 chhunga hman turin an rél a, thupui atan ‘I neih sa a lo pun lehzual theih nan kângmei lakah fimkhur zir ang che’ tih an thlang.