KHAWTHLIR

CM-in tlawh
Chief minister Zoramthanga chuan nimin zing khan Electric Veng YMA Hall a tlawh. Chief Minister hi Electric Veng YMA leh khawtlang hruaitute nen an inkâwm a, hall siamṭhat ngai laite an enho a ni.

Zirtirtu lawmpui
Magic Bus Foundation chuan School Education Directorate conference hall-ah nimin khan Covid-19 lèn laia zir chianna an neih hmanga sikul headmaster, zirtirtu leh community coordinator thawk ṭha mi 19 lawmpuina hun an hmang a, School Education director James Lalrinchhana’n a hmanpui. Magic Bus Foundation hian headmaster pathum leh zirtirtu 16 hnenah lawmpuina an hlan a ni.

Kawng siam dawn
Naktuk zing dar 11 aṭanga tlai dar 4:30 thleng PWD-in Ṭhuampuia Zuangtui péng leh Supply kudam inkar kawngpui an thawm ṭha dawn a, hei vang hian kawngpui chanve khâr a ni dawn. Hnathawh tibuai thei tura lirthei leh bungrua dah phal a ni lo. Thupek hian hna thawh zawh hma zawng a huam dawn a ni.

MZU Sports Meet
Mizoram University (MZU) Sports department buatsaih MZU Annual Sports Meet 2021-22 chu nimin khan zawh a ni a, a pumpuiah Pachhunga University College chu pakhatna an ni. Nimina khàrna inkhawmah MZU pro vice chancellor Prof. JK Patnaik-a'n lawmmante a sem a ni.

Lungin mi 1 delh hlum
Nimin tlai dar 3:30 vel khan Kulikawn Ngaizelah kawng chhak lam aṭanga lung tlain kawngpui sira ei rawngbawlna gas buaipui mektu mi pahnih a delh a, mi pakhat a thih bakah mi pakhat dang a hliam. Kulikawn Police Station aṭanga thu dawn danin, mitthi hi Bihar lam mi Mortuza a ni a, hliam chu Laltlangmawia, Kulikawn a ni.

Hmanrua hlân
Mizoram Youth Commission (MYC) leh Siaha District Core Team on Skill Development Framework-te'n ei siam dan zirna (food processing training) an buatsaiha zir chhuakte hnenah nimin khan Siaha additional DC Donny Lalruatsanga'n hmanraw chi hrang hrang a hlân.