Mizoramah hripui vei an tlem zel laiin India rama hmuh tamna zingah a la tel

Mizoramah March 24, Ningani khan Covid-19 vei mi 173 hmuh chhuah a ni a, India ramah Kerala dawta hmuh tam berna a ni. Mizoramah Covid-19 vei hmuh chhuah thar zat a tlâkhniam hret hret laiin, India ram pumah positive hmuh thar hmuh tam berna zinga mi a la ni zel.

Nimin tlai dar 5 thleng dinhmun angin Covid-19 vei enkawl lai mi 1,143 an la awm a, chu chu positive hmuh tawh zawng zawng aṭangin 0.52% chiah niin, a tlahniam tial tial.

Covid-19 vei Ningania hmuh thar mi 173-te chu mipa 63 leh hmeichhia 110 an ni a; RT-PCR hmanga hmuh chhuah pakhat, TrueNAT hmanga hmuh pali, RAT hmanga hmuh 162 leh FIA hmanga hmuh paruk niin, positivity rate 15.45% a ni. Nimin khan hripui vei dam tawh mi 148 chhuahtir an ni a, hripui vangin mi pakhat a thi.

IDSP record angin, Mizoramah Covid-19 vei 2,23,516 hmuh chhuah a ni tawh a, mipa 1,04,231 leh hmeichhia 1,19,285 an ni a, mipa aiin hmeichhia 15,054-in an tam zawk. Nimin tlai dar 5 thleng khan mi 2,21,693 (99.18%) chhuahtir an ni tawh a, mi 680 (0.30%) thi tawhin, enkawl mek mi 1,143 (0.52%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,23,516 chu mi 1,000 zelah hripui vei mi 203 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.

Kum 2011 chhiarpuia mihring awm zat aṭanga chhûtin Mizoram chu Covid-19 positive hmuh tamna ber a ni a; positive hmuh tawh 2,23,516 chu kum 2011 chhiarpuia mi awm zat 10,97,206 aṭangin 20.37% a tling.

Nimin zing lam dinhmun angin, India ramah Covid-19 vei enkawl mek mi sang khat aia tam awmna state panga a awm a; chu'ngte chu Kerala (5,629), Maharashtra (4,970), Karnataka (1,834), Assam (1,363) leh Mizoram (1,292)-te a ni.