Inthlanpui tluang taka neih a ni

Mizoram Legislative Assembly inthlanpui chu nimin khan Mizoram pumah tluang tak leh muanawm taka zawh a ni. Hriat theih chin, nimin tlai dar 4 thleng khan vote 71% a tla tawh a, kum 2013 MLA inthlanah khan vote 83.41% a tla. Vote tlate hi December 11, 2018-ah district hrang hrangah chhiar a ni ang.

Mizoram inthlanpuiah hian Assembly constituency 40-ah voter 7,70,395 awmin, mipa 3,75,498 leh hmeichhia 3,94,897 an ni a; service voter 4,363 an awm.

Vote thlak hi zing dar 7-ah ṭan a ni a, ruahman dan chuan tlai dar 4 thleng vote thlak tur a ni. Hmun eng emaw zatah EVM leh VVPAT chhia a awm a, chu'ngte chu thlak/siamṭhat an nih hnuah vote thlak chhunzawm a ni.

Tlai dar 4 thlenga vote thlak tur ni mah se, Aizawla veng tam takah leh khaw dang ṭhenkhatah chuan dar 4-ah vote thlak zawh hman a ni loh avangin, dar 4 hnu lamah pawh vote thlak chhunzawm a ni. Hengte vang leh, polling station ṭhenkhat chu hmun kilkhawr tak taka awm a nih avangin vote tla zat dik tak hriat theih a ni rih lo.

He thu ziah lai thlenga district hrang hranga vote tlak ṭhatna ber chu Serchhip district niin 81% a tla a, vote tlak chhiatna ber Aizawlah chuan 65% a tla. Nimin vote thlaknaah hian EVM leh VVPAT chhia a awm bak chu harsatna thleng a awm hriat a ni lo.

Hmun tam takah EVM leh VVPAT a chhiat avang hian hun tiam chhungin vote thlak zawh hman a ni lo a, hei vang hian zan dar 7 thleng khan vote thlak a la ni a, hmun ṭhenkhatah chuan zan dar 9 an thlen an inring.

Tripura relief camp-a Bru-te tan bik Kanhmunah special polling station 15 siam a ni a, special polling station bikah hian vote thlak hun chu zing dar 7 aṭanga tlai dar 3 a ni. Bru-te'n vote thlak tura Kanhmun an panna tur motor chu Tripura sorkarin a ngaihtuahsak a, senso erawh chu Mizoram sorkar tum tur a ni.

Tripura-a awm Bru-te tan bika vote thlakna tura ruahman Kanhmuna siamah hian vote 6,284 a tla a ni. Bru refugee camp-ah hian Mamit district, Lunglei district leh Kolasib district-ah vote nei mi 11,987 an awm a ni.

Kumina Assembly inthlanah hian candidate 209 an awm a; Indian National Congress (INC) leh Mizo National Front (MNF) ten constituency awm zawng zawng an chuh kim.

BJP-in bial 39-ah candidate an nei a, ZPM (independent)-in bial 37, Zoram Thar-in bial 23, PRISM-in bial 13, NPP-in bial pakua leh NCP-in bial panga an chuh duh dawn a; thlawptu pawl nei lo independent candidate pathun an awm.

Inthlan atan hian electronic voting machine (EVM) ballot unit 1,859 leh control unit 1,841 hman a ni a; voter verifiable paper audit trial

(VVPAT) 1,751 hman a ni. State pumah police company 48 (company pakhatah police 120-130 vel an awm) leh central armed police force company 40-te'n venhim hna an thawk.

Kumin inthlan turah hian polling station 38 chu vulnerable polling station atan puan a ni a, chu'ngte chu ramri hnaiha awm a ni deuh ber. Critical polling station 47 a awm a, chu'ngte chu kum 2013 inthlana vote tlak ṭhatna leh candidate pakhat an vote hukna polling station a ni deuh ber.

Inthlanna thianghlim leh felfai a awm theihna atan Mizoram hmun hrang hrangah Mizoram People Forum (MPF)-te an duty a, vote thlak turte an lo buaipui ṭhin. Election official-te pawhin inthlanah thil dik lo a awm leh awm loh an vil reng a ni.

Mizoram Assembly Election 2013-ah khan Congress party-in bial 40-ah vote 2,55,719 hmuin, hei hi candidate zawng zawngte vote hmuh belhkhawm 5,73,210 aṭangin 44.61% a ni a, bial 34-ah hnehna an chang a ni.

Vote tlak dan
(4:00 p.m. thleng)
District Vote tla %
Mamit 70
Kolasib 77
Aizawl 65
Champhai 75
Serchhip 81
Lunglei 77
Lawngtlai 69
Siaha 73