Inthlanna felfai takin kan nei - CEO

Mizoram chief electoral officer (CEO) Ashish Kumar chuan nimin tlai khan thuthar thehdarhtute a kâwm a; inthlanna thianghlim leh felfai a awm theihna atan tlawmngai pawl, thuthar thehdarhtute leh mipuite hmalakna fakawm a tih thu sawiin, "Ṭum dang ang bawkin Mizoram chuan inthlanna thianghlim leh felfai a nei thei a, a lawm hle a ni," a ti.

Ashsih Kumar chuan, Kanhmuna Bru-te dawnsawn an nih dan chu lawmawm a tih thu sawiin, "Mipuite'n ṭha takin an lo dawngsawng a, a lawmawm tak zet. Bru-te'n ṭha taka vote an thlak theihna atan tlawmngaia hnatlang pawh mi eng emaw zat an awm. Bru-te'n vote an thlak theihna atan Tripura sorkar hmalaknaah kan lawm hle," a ti a; inthlanna thianghlim leh felfai a awm theihna atana thawktu zawng zawngte hnenah lawmthu a sawi.