MPCC, MNF leh ZPM-in sorkar an inbeisei

Congress party president Lal Thanhawla, MNF president Zoramthanga leh ZPM chief ministerial candidate Lalduhoma te chuan thuthar thehdarhtute zawhna chhangin, nimina Mizoram inthlanpui neih tâkah a mala sorkarna chan an inbeisei thu an sawi vek.

Hawla'n seat 27+ a beisei

MIzoram Pradesh Congeress Comm-ittee (MPCC) president Lal Thanhawla chuan nimina vote a thlak zawha thuthar thehdarhtute zawhna chhangin, seat 27 chin chung lam an chan theih an inbeisei thu a sawi.

Lal Thanhawla chuan, a mala sorkarna an siam theih ngei a beisei thu a sawi a, "Kan sorkarna chhan tur chu kan hnathawh ṭhat avang a ni. Kan hnathawh hi chanchinbu hrang hrangah hmuh tur a awm," a ti.

Mipuite'n change an sawi nasat thu thuthar thehdarhtute an sawi chungchangah Lal Thanhawla chuan, "Tu pawhin an ngaihdan an sawi thiang a, an sawi ni maiah ka ngai," a ti a; democracy ram a nih angin mi tinin an ngaihdan an sawi a thian thu a sawi.

Zorama'n seat 25-30 lâk inring

Nimina vote a thlak zawha thuthar thehdarhtute zawhna chhangin MNF president Zoramthanga chuan, seat 25 aṭanga 30 inkar an lak a beisei thu a sawi.

Zoramthanga chuan, thla hnih/thum chhungin MNF boruak a sang nia sawiin, "Kum 1986-ah kan lo chhuak a, kum 1987-ah kan boruak a lian hle. Tun ṭumah chuan Congress sorkar duh lohna nen, MNF programme leh manifesto-te an lo duh nen, chuvangin, last minute-ah MNF an zawm hum hum a ni," a ti.

MNF President chuan, party mala sorkarna siam theih a inrin thu sawiin, "Kan khingpui ber chu Congress an ni-ah ka ngai," a ti a; a dinna bialah mawi tawk taka a chak a inrin thu a sawi.

Tun ṭum inthlanah electronic voting machine (EVM) a rin tâwk thu sawiin Zoramthanga chuan, "Tunah chuan EVM hi VVPAT nen thlunzawm vek a ni tawh a, a inkawp hi chuan tihchingpen theih a ni lo a, chuvangin ka ring tâwk a ni," a ti.

Duhoma'n seat 24-25 beisei

Zoram Peoples' Movement (ZPM) chief ministerial candidate Lalduhoma chuan, ZPM-in seat 24-25 inkar an lak a beisei thu a sawi.

Nimina vote a thlak zawha thuthar thehdarhtute zawhna chhangin Lalduhoma chuan, mipuiin change an duh tawh avangin sorkarna chan ngei an inbeisei thu a sawi a, "Kan beisei piah lamah mipui support kan hmu a ni. Thawhpui lam kan ngaihtuah lo, a mala sorkarna siam theih ngei kan inring," a ti.

ZPM CM Candidate chuan, ZPM-a tel pawl hrang hrangte'n pawl pakhat anga an inkaihhruai thu sawiin, "Khawiah mah a hrangin kan function tawh lo a, pawl pakhat angin kan kal," a ti a; inthlan zawhah Election Commission of India aṭangin pawmpuina (recognition) hmuin, political party anga an kal ve tawh tur thu a sawi.

Lalduhoma chuan, tun inthlanah a tling lo emaw, ZPM an sorkar lo emaw a nih chuan politics khelh a tum tawh lo tih a sawi a, "Mahni chakna, mahni pawisaa thingtlangte han hrût leh tur chuan economically pawhin ka tlin ka ring tawh lo," a ti.