Mizoram inthlanah thil thar 10 chuang kalpui

Nimina Mizoram Legislative Assembly inthlanpui neih takah Election Commission of India (ECI) chuan thil thar 10 chuang a kalpui.

Kum hmasa lama inthlanpuia la tih ngai loh eng emaw zat tih niin, sum sen pawh a tam phah niin Mizorama Election department hotute chuan an sawi.

Election department hotute chuan, kum hmasa lama Mizoram inthlanpuia la tih ngai loh tih thar zingah, Assembly constituency tinin a ruala vote an chhiar theihna atan counting hall hranpa an nei vek dawn a, inthlan result pawh puan zung zung theih beisei a ni.

Assembly constituency 40-a result-te chu rei lo tê-ah chhiar zawh theih beisei a ni a; kum 2013 inthlanpuiah vote chhiar chhung a rei em avangin ruahmanna thar siam a ni, an ti.

Assembly constituency tinah VVPAT hman a nih tawh avangin Mizoram páwn aṭangin security force chah luh a ngaih tam phah a, kum 2013-ah chuan Aizawl district-ah chauh hman a nih thu an sawi.

An sawi danin, EVM strong room leh critical polling station chu central armed police force (CAPF)-te chauhin an veng a, platoon pakhat zel (mi 30)-in an veng a ni. EVM leh VVPAT hman zawng zawng chu a thar hlak a ni bawk.

ECI duh dan angin, EVM a ṭha tawk a, a rintlak tâwk a ni tih mipui zirtir nan EVM awareness campaign neih a ni a; Lawngtlai district leh Mamit district-a khaw pahnih khat, motor kal theih lohna tih loh chu an kal chhuak vek niin an sawi. EVM awareness campaign-ah hian voter zinga 20% velin vote an thlak chhinah an ngai.

Kumina inthlanah hian kum dang aia lianin voting compartment siam a ni a, plastic vek hman a ni. Vote thlaknaa kal tur, pianphunga rualbanlo, Persons with Disabilities (PwD)-te chu motor hmang duh inhriattir lâwk turin an ti a, inhriattir lâwkte chu sorkar motor hmanga hruai tura ruahmanna a ni.

Constituency tina polling station pakhat zelah webcasting tih a ni a, internet-ah live-a tihchhuah a ni. Hei hi mipui tana en theih tura tih a ni lo a, ECI leh Election hotute'n an en theih tura siam tum a ni. Assembly constituency tina polling station pakhat zelah hmeichhia chauh duty-na hmun, Pink Polling Station siam a ni bawk.

Inthlana duty-te'n harsatna an tawh palh thuta phurh nan ECI-in air ambulance pahnih tal inring tura a tih angin, Kolkata-a mi chah a ni. Inthlan hmasaa service voter-te'n ballot paper hmang vote an thlak chu tidanglamin, electronically transmitted postal ballot system hmangin, internet kaltlanga tih a ni.

Mizoram aṭanga Bru tlanchhia, Tripura camp-a awm mek voter 12,000 chuangte tan Kanhmunah special polling station 15 siam a ni a; Mamit district-a vote neite tan polling station pakua siam niin, Kolasib district leh Lunglei district-a vote neite tan polling station pathum ve ve siam a ni.

Election observer erawh kum dang aiin an tlem a; kum 2013-ah observer mi 20 chuang an lo kal laiin, kuminah chuan mi 14 chiah an lo kal.

Serchhip, Siaha, Kolasib, Lawngtlai, Mamit district-ah observer pakhat ṭheuh, Champhai district-ah mi pahnih, Lunglei district-ah mi pathum leh Aizawl district-ah mi pali an awm.