Political party-te'n lawmthu an sawi

Congress, MNF leh PRISM party-te chuan a hranpa ṭheuha thuchhuah siamin, Mizoram pumah inthlanpui muanawm leh felfai taka neih a ni chu lawmawm an tih thu an tarlang a; remna leh muanna boruak hnuaiah thlamuang taka mipuite’n vote an thlak theih avang­in an lawm hle tih an sawi.

MPCC chuan, inthlanna muanawm tak a awm theih nana theihtawpa thawktu sorkar hnathawk zawng zawng te, Mizoram hmun hrang hranga inthlanna muanawm leh thianghlim a awm theih nana theihtawp chhuahtu Mizoram People’s Forum (MPF) chungah lawmthu an sawi tih an sawi a, "Political party zawng zawng leh independent-a inthlan chuh zawng zawngte'n inthlan result hian eng pawh rawn her chhuahpui se, Mizoram hmasawnna atana ngaihtuahna sênga thawk chhunzawm zel turin kan ngen a ni," an ti.

Congress party chuan, India rama inthlan muanawm leh entawntlak ber Mizoramin a nei leh thei chu lawmawm an tih thu te, India ram media liante’n state dangte pawhin entawn se ti hiala an tarlang chuan Mizo nih a tihnawm thute an sawi bawk.

MNF party chuan, Mizoram inthlanpui Pathian kaihhruainaa tluang tak leh hlawhtling taka neih a ni chu lawmawm an tih thu sawiin, "Vote thlaktu zawng zawng chungah lawmthu kan sawi a, inthlanna muanawm leh felfai neihna tura an thâ leh hun sengtu, MPF leh police zawng zawngte chungah thinlung takin lawmthu kan sawi a ni," an ti.

MNF chuan, MNF party-in hnehna a chan theihna atana tha leh zung sengtu, hmun hrang hranga party worker zawng zawngte chungah an lawm thu an tarlang bawk.

PRISM party pawhin thuchhuah siamin, "Harsatna leh dan bawhchhiatna eng eng emaw awm mah se, harsatna leh buaina lian tham awm loa kan zo thei hi a lawmawm kan ti. Political party dangte chungah lawmthu kan sawi a, vote thlak zawng zawng chungah lawmthu kan sawi bawk. Hetiang boruak muanawm hnuaia inthlan kan neih zel theih nana ṭan la zel turin party, pawlte leh mi tin kan sáwm a ni," an ti.