Ruih vangin polling official 3 chawlhtir

Nimina Mizoram Assembly in­thlanpuiah polling official zinga pathum chu zu an ruih avangin thlâk an ni a, an thawhna department-te chu thil awm dan chhui chiang a, a ṭul anga action la tura tih an ni.

Election department hotute hnen aṭanga thu dawn danin, PWD Executive Engineer (Highways) pakhat, Thorang biala Sachan polling station-a polling official chu zu a in hnuah Saikuti Hall, Lungleiah inthlanna hmanrua/bungrua la turin a kal a. Lunglei district-a duty tur presiding officer pahnih chu an rûi ngeia hriat a nih avang leh mawi lo taka polling official dangte laka an chet avangin election duty aṭangin chawlhtir an ni bawk.

Mi pathumte chu election duty aṭanga chawlhtir an nih bakah, Election department chuan an awmna department ṭheuhte chu departmental enquiry ti tur leh a ṭul anga action la turin an hriattir a ni.

Mi pathum zinga pakhat, J Buana College-a zirtirtu chungchangah Lung­lei DC leh DEO Dr Ankita Chakravarty chuan J Buana College Principal hnenah lehkha a thawn a; lehkhaah chuan presiding officer chu DC complex-ah rûi chungin mawi lo takin a che a, mi dang hmuh laiin senior officer dang pakhat kutthlak a tum tih ziah a ni.

Sachan polling station-a presiding officer PWD EE (Highways) chung­changah Lunglei DC chuan, presiding officer rûi chunga a duty chu an ngaih thutak thu leh Lungleia PWD Superintending Engineer chu departmental proceedings ti tura hriattir a nih thu a tarlang.

West Tuipui bial chhung, Phairuangchhuah polling station-a third polling officer, Rualalung Primary School-a Headmaster pawh a ruih avangin a duty-na turah a awm lo a; chuvang chuan a chungah dan anga thil ti turin Lunglei South Sub-Divisional Education Officer hriattir a ni.