Khawmawiah sipai leh CNDF an inkâp ; Zokhawtharah ráltlân an luh belh

March 26, Inrinni zing dar 5 vel khan Myanmar-a Khawmawiah Myanmar sipaite leh Chin National Democratic Force (CNDF) sipaite an inkâp a; hei vang hian Khawmawi aṭangin mi eng emaw zat chu Ṭiau lui kanin sahimna zawngin an khaw ep Mizoram chhunga Zokhawtharah an tlân lut.

Thu dawn danin, Inrinni zing khan Myanmar sipaite'n CNDF an bei thut a, darkar khat vel an inkah zui hnuah CNDF-te chu an inthiar fihlîm ta a ni. Myanmar sipaite'n CNDF mi pakhat an kâp hliam a, mi pathum an man bawk. CNDF mite tlanchhiatsan bungrua leh bike-te chu Myanmar sipai chuan Ṭiau lei bulah an hâl zui a ni.

Zokhawthar aṭanga thu dawn dan dawnin, Myanmar sipaite'n an kah hliam CNDF mi pakhat chu Champhai District Hospital panpui a nia sawi a ni a; Champhai DC office-a hotute erawh chuan Champhai Hospital-a hruai an awm thu report an dawn loh thu an sawi thung.

Inrinnia inkahna avang hian Khawmawi mipui zinga eng emaw zat chu sahimna zawngin Zokhawtharah an tlan lut leh a, tun dinhmunah chuan Khawmawi mipui tam zawk chu an khua chhuahsanin Mizoram lamah an lut rih niin an sawi.

He mi hmaa inkahna a thlen pawhin Khawmawi mite chu Zokhawtharah an tlan lut tawh ṭhin a; a rálmuan deuh hnuah Khawmawiah an lêt leh mai ṭhin a, lêt rih loa Zokhawthara la awm zui eng emaw zat an awm bawk.

Tun hnaiah Myanmar sipaite leh sipai rorelna dodaltu pawl hrang hrangte chu Khawmawi leh a chhehvelah an inkâp zauh zauh a; February 29, 2022 leh March 5, 2022 khan CNDF-te chuan Myanmar sipai an lo bei thut tawh a ni. Mipui sipai pawl hrang hrangte chu an hmunah an kîr tawh laiin, Falam CNDF-te erawh chu Khawmawiah an inkulh zui thung.

CNDF-te hian chawlhkar khat vel kal ta khan Mizoram leh Myanmar inrina Ṭiau lui leia Myanmar flag intár chu la thlain, CNDF flag an tár a; CNDF flag chu Inrinni khan Myanmar sipaite'n la thlain, Myanmar flag an târ ve leh nghal a ni.