MPCC-in chhim hrût fehchhuah an zo ; Politics hi a ṭha zawnga her dik a ngai - MPCC President

Mizoram Pradesh Congress Committee (MPCC) hruaitute'n 'Chhim hrût fehchhuah' an kalpui chu March 26, Inrinni khan an zo. A tawp ní-ah hian Hnahthial leh Serchhipah vantlang inkhawm an buatsaih a, MPCC president Lalsawta chuan, politics chu a ṭha zawnga her dik a ngaih thu a sawi.

Lalsawta chuan, Myan­mar ram nasa taka an buai chhan leh indo­na avanga Ukraine buai chhan chu politics vek a nih thu sawiin, "Politics-ah hian ka tel ve lo ti ringawt loin, siamṭhat tumin theihtawp i chhuah ang u. Politics ṭha lo hian kan zavaiin min hrût vek a ni. Politics hi a ṭha zawnga her dik a ngai a, sorkar ṭha i siam ang u. Chutiang tur chuan mi tinte thawhpuiah ka sawm a ni," a ti.

Mizo mipuite anmahni an inchhan chhuah a ngaih thu sawiin MPCC President chuan, "Eng ram mahin min chhan chhuak dawn lo. Kei chuan beiseina hi ka tlangaupui a ni. Kan ṭhalaite hian keini puitling tawh te, upa zawkte ai hian ram an vei zawk daih a, dikna pawh an duh zawk. Chu chu Mizoram siamṭha tura beiseina ka neih chhan a ni," a ti a; 'Ka ta a ni lo' tih chûl ngai khawpa sum ngah nih a tum loh thu a sawi.

MPCC vice president Lal Thanzara pawhin thu sawiin, "Pu Lalsawta kaihhruaina hnuaiah hian sorkar ṭha zawk siam kan tum. Chief Minister ṭha neih duh apiangte chu Pu Lalsawta thláwp a, Congress thláwp leh hrâm turin ka ngen che u. Nasa taka danglam kan tum. Congress party-in Mizoram tana hma­sawnna nasa tak a thlen tawh ṭhinte aia nasa zawk thlentir kan tum a ni," a ti.

Thusawitu dang MPCC treasurer Zodin­tluanga Ralte chuan, hotu lú berin a zir loh chuan a thawhpuite pawhin an zir thei lo tih sawiin, "Kan President Pu Lalsawta chuan, 'Kan minister leh MLA-te eirukna, hlemhletna thila mualpho an awm chuan ka bàn dawn' a ti. Chutianga huaisen tur khawp chuan amah hi a dik tlat a ni," a ti a; Lalsawta thusawi ang chu Lalduhoma leh Zoramthanga ten an sawi ngam a rin loh thu a sawi.

MPCC thuchhuah tarlan danin, chhim hrût fehchhuahah hian khaw 30 chuang an tlawh a, Congress party-ah mi 3,800 an lawm lut a ni.