CS-in rél kawng siam mek a enfiah ; Zangnadawmna vbc. 840 vel sen a ni

Chief secretary Dr Renu Sharma chuan March 26, Inrinni khan Bairabi leh Sairang inkara rél kawng siam meka ‘New BG Line from Bairabi to Sairang’ chhunga Sairang leh Khamrang inkara hna thawh mekte a enfiah. Railways hotute sawi danin, rél kawng siamna atana zangnadawmna pek ngai cheng vbc. 840 vel chu pek vek a ni tawh.

Chief Secretary hian Sairang Zero Point aṭangin hna thawh mekte en ṭanin, Khamrang thlengin a kal a; hmun hrang hranga lei verh (tunnel) te, lei dawh (bridge) innghahna tura a dona ‘pier’ siam te, Khamrang leh Mualkhang bula lei dawh (bridge) chunga superstructure thira lei dawh rel mek te, rél tlânna tur dawh mek te, hmun ṭhenkhata rél tlanna tur track sial mekte leh Sairang leh Mualkhanga rel chawlhhmun sak mekte a enfiah a ni.

Bairabi-Sairang inkara rél kawng siam mek chu Mizoram tan mai ni lo, ram pum huap pawha national project pawimawh leh ro tling a nih avangin tluang taka a kal a pawimawh thu sawiin Renu Sharma chuan, hnathawh chungchangah harsatna an neih chuan rang taka state sorkara thuneitute hnena thlen ṭhin turin Railways engineer-te a chah.

Bairabi-Sairang rél kawng hi a lian chi, broad gauge railway line a ni dawn a, enfiah hna RITES-in kum 2005 khan an zawh hnuah sorkar laipuiin kum 2008-09 khan sum a pe ṭan. Kum 2015 khan hna thawh ṭan a ni a, 70% vel thawh zawh a ni tawh. Railways engineer-te chuan, November/ December 2023-ah zawh beisei a nih thu an sawi.

Rel kawng siamna atan hian a tirah cheng vbc. 2,384.34 ruahman a ni a; sum ruahman chu ennawn ṭhin niin, tunah chuan rél kawng siam zawh nan cheng vbc. 6,547 vel sên a ngai dawna chhût a ni. Railways hotute sawi danin, Bairabi-Sairang railways project atan hian ram hectare 481.18-a zau hman a ni a, Kolasib district chhungah forest ram hectare 38.94-a zau leh mimal ram hectare 308.01-a zau hman a nih bakah, Aizawl district-ah forest ram hectare 35.547-a zau leh mimal ram hectare 98.595-a zau hman a ni.

Bairabi leh Sairang inkarah rel chawlhhmun (station) pali a awm dawn a; Bairabi aṭanga tehin km. 16.38-naah Hortoki chawlhhmun, km 26.10-naah Kawnpui chawlhhmun, km 37.12-naah Mualkhang chawlhhmun leh a tawpna km 51.38-naah Sairang chawlhhmunte a awm dawn a ni.