Thawk rim apiang beidawnna ramah Mizoram a chang mek - Lalduhoma

Zoram Peoples Movement (ZPM) Southern Headquarters chuan an fehchhuah programme kal zelah March 25-26 khan Pangzawl leh Rawpui khuaah vantlang inkhawm an buatsaih a; ZPM leader Lalduhoma'n thu sawiin, "Thawk rim apiangte beidawnna ramah Mizoram a chang mek a ni," a ti.

Lalduhoma chuan, Mizoramah politics-a harh tharna a thleng mek tih sawiin, "Kan party-ah hian neutral leh sorkar hnathawkte'n ram veina thlarâu an chang mek. Kan thutiam leh policy tihlawhtling tur hian beiseina sâng tak neiin, mi chi hrang hrangin kan party an rawn zawm thar mek zel a ni," a ti a; party sorkar ni lo, mipui sorkarah Zoram mipui an tuihàl thu a sawi.

ZPM Leader chuan, an thutiam leh policy tihhlawhtlin chu an tum ber a nih thu sawiin, "Pathian leh mipui zárah ZPM hian sorkarna kan chang a nih a, kan thutiamte kan tihlawhtling thei lo a nih chuan rinawm taka ZPM party member nih reng leh min zui reng hi in bat a ni lo. Chutih rualin, kan policy tihlawhtling tur chuan sorkarna kan siam ngei a ngai," a ti.

Mizoramin a mamawh ber chu rorêlna dik a nih thu sawiin Lalduhoma chuan, "Political party-ah Pathian ram a thlen phawt loh chuan rorêlna dik a thleng thei ngai lo ang. Pathian thu aṭangin kan ram kan vei tur a ni a, Pathian manifesto nen kan ram hi kan kalpui a ngai a ni," a ti a; sawiselna karah Pathianin ram leh hnam tana hna thawk turin ZPM a duh a rin tlat thu a sawi.

ZPM Leader chuan, kut hnathawk­tute'n enkawltu an nei lo tih sawiin, "Kut hnathawktute tan hian dinchhuah ve ngaihna a awm lo rêng rêng a ni. Taimakin awmzia a neih lohna ram, bianga thlan tui luang zawih zawih chunga hna thawh pawhin awmzia a neih lohna ramah kan sorkar hrawn tawhte leh kan hrawn mekte hian min hruai lut a ni," a ti.

ZPM thuchhuah tarlan danin, Pangzawl leh Rawpuiah hian an party zawm thar mi 245 an lawm lut a ni.