MYC Incubation Centre tur lungphùm phúm

Mizoram Youth Commission (MYC) chairZman Dr Vanlalṭanpuia, Lunglei North bialtu MLA ni bawk chuan March 26, Inrinni khan Lunglei Serkawnah MYC Incubation Centre tur lungphùm a phúm a; MYC Super IAS 40 kalpui turin budget-ah cheng nuai 200 dah tawh a nih thu a sawi.

Dr Vanlalṭanpuia chuan, MYC Incubation Centre-ah ṭhalaite hmasawnna tura hmalakna hrang hrang - competitive coaching, information technology, skill development leh entrepreneurship-te a leng vek tih sawiin, "Residential tura ruahman a ni a, human resource tihhmasawnna leh economy ṭhan zelna turin ṭangkai taka hman a ni dawn. MYC Super IAS hi zau zawka kalpui tum a ni a, Super IAS 40 kalpui turin budget-ah cheng vbc. 2 dah a ni tawh," a ti.

Lunglei, Siaha leh Kolasib district-ah MYC Coaching Centre hawn a nih tawh thu sawiin MYC Chairman chuan, "Champhaiah pawh hawn leh thuai tum a ni a, Aizawl leh Serchhip-ah MYC Youth Centre sak mek niin Lungleia MYC Youth Centre sak mek pawh zawh ṭêp a ni," a ti a; competitive exam coaching bakah, cement mistiri, ei tur sawngbawl, cake ur, cabin crew, army pre-recruitment training, music leh sports lamahte hmalak zel tum a nih thu a sawi.

Dr Vanlalṭanpuia chuan, Khawiva panna kawng Aizawl-Thenzawl-Lunglei kawng leh Lunglei khawpui chhung kawngte thawm ṭhat a nih dawn thu a sawi a, MZU Southern Campus tura ruahman chei ṭhat hna tluang takin a kal a, chuta tan chuan cheng vbc. 15 ruahman a nih thu a sawi bawk.