Mi 8,21,734-in Covid vaccine la tawh

March 26, Inrinni thleng khan Mizoramah mi 8,21,734-in Covid-19 laka invênna damdawi (vaccine) an la tawh a, hei hi kum 2011 chhiarpuia Mizorama mihring awm zat 10,97,206 aṭangin 74.89% a tling. Vaccine pek tawh zawng zawng chu dose 15,13,742 a ni.

IDSP report-a a lan danin, Inrinni thlenga Covid-19 vaccine la tawh mi 8,21,734 zinga 6,66,127 (81.06%) chuan dose hnihna an la tawh a; dose hnihna la tawh zinga healthcare worker, frontline worker leh kum 60 chin chung lam mi 1,16,879 zinga mi 25,881 (22.14%)-in precautionary dose an la tawh.

March 26, Inrinni bikah chuan mi 340 hnenah Covid vaccine pek a ni a; dose khatna 289 leh dose hnihna 51 a ni.

March 16, 2022 aṭanga India rama kum 12-14 inkarte hnenah Covid-19 vaccine (Corbevax) pek ṭan a ni a; Mizoramah chuan Siaha district tih loh district dang zawngah March 26, Inrinni thleng khan kum 12-14 inkar mi 9,104 hnenah Corbevax pek a ni tawh.