Aizawl dist-ah a záwnin ni nga chhung Covid-19 positivity rate 5% aiin a hniam

Mizoram khawpui ber awmna leh mihring tamna ber Aizawl district-ah a záwnin ni nga chhung Covid-19 positivity rate 5% aia hniam a ni tawh a, a záwnin ni ruk chhung positive hmuh tam berna district a ni tawh lo bawk.

Nimin tlai dar 5 thleng dinhmun angin Covid-19 vei enkawl lai mi 1,156 an la awm a, chu chu positive hmuh tawh zawng zawng aṭangin 0.52% chiah a ni.

Mizoramah hripui vei March 25, Zirtawpni khan mi 131 leh March 26, Inrinni khan mi 146 hmuh chhuah a ni a; hripui vei dam tawh Inrinni khan mi 192 leh nimin khan mi 71 chhuahtir niin, Covid-19 vei mi pakhat a thi.

Covid-19 vei March 25-a hmuh chhuah mi 131-te chu mipa 50 leh hmeichhia 81 an ni a; TrueNAT hmanga hmuh pakhat, RAT hmanga hmuh 128 leh FIA hmanga hmuh pahnih niin, positivity rate chu 7.90% a ni. RT-PCR hmanga swab sample endik zingah positive an awm lo.

March 26-a hripui vei hmuh thar mi 146-te chu mipa 64 leh hmeichhia 82 an ni a; TrueNAT hmanga hmuh pahnih, RAT hmanga hmuh 142 leh FIA hmanga hmuh pahnih niin, positivity rate 13.87% a ni. RT-PCR hmanga sample endik zingah positive hmuh a ni lo.

IDSP record angin, Mizoramah Covid-19 vei 2,23,793 hmuh chhuah a ni tawh a, mipa 1,04,345 leh hmeichhia 1,19,448 an ni a, mipa aiin hmeichhia 15,103-in an tam zawk. Nimin tlai dar 5 thleng khan mi 2,21,956 (99.18%) chhuahtir an ni tawh a, mi 681 (0.30%) thi tawhin, enkawl mek mi 1,156 (0.52%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,23,793 chu mi 1,000 zelah hripui vei mi 203 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.