Police-in fimkhur turin mipui chah

Mizoram Police chuan thuchhuah siamin, ṭhumvàwrna (lottery) man anga inbumna avangin mi tam takin sum leh pai an hloh tawh thu an tarlang a; fimkhur turin Mizoram mipui an chah.

Mizoram Police chuan, mi bum chíngte’n email leh phone call hmangin inbumna an kalpui a, lottery-ah pawisa tam tham tak emaw, thil hlu tham tak emaw an man thu an hrilh ṭhin tih an tarlang a, “Pawisa dawng tur hian identity card, bank account leh pawimawh dangte finfiah a ngai tiin mimal thil pawimawh rûksak an tum ṭhin. Chhiah (tax) te, thawnna man te, buaipuina man te, pek hmasak ngai angin an sawi ṭhin bawk. Heng an thil phûtte hi a tàwpa dawn tur aṭanga chhûta tlemtê chauh a nih ṭhin avangin mi tam tak chu heng thangah hian âwkin, misual lakah rim taka thawh chhuah sa sum leh pai an hloh ṭhin a ni,” an ti.