Robert Romawia thusawi a dik vek - MNF party

MNF party chuan, Mizoram sorkar leiba chungchanga minister of state Robert Romawia Royte thusawi chu a dik vek niin an tarlang a, "MNF sorkar hnuah GSDP aṭanga chhûtin sorkar leibá a tlahniam zel a ni. Hei hian kan CM leh FM ni bawk Pu Zoramthanga sum enkawl thiamzia a tilang," an ti.

Minister Robert Romawia Royte-in Mizoram leibat zat a sawi chu Reserve Bank of India (RBI) website aṭanga a lak chhuah a nih thu sawiin MNF thuchhuah chuan, "MNF sorkar hnuah Covid hripui karah pawh Gross State Domestic Product (GSDP) aṭanga leiba percentage a tlahniam zel tih a sawi a, GSDP aṭanga percentage hmanga leiba chhût chu chhût dan dik ber a nih thu a sawi bawk," a ti a; Robert Romawia sawi chu a dik vek niin

an tarlang.

Robert Romawia thusawi chu Congress party-in a dik lo ti dawt si loin, mipui bum thei zawngin thuchhuah an siam tih sawiin MNF chuan, chauhthubarawh hlea an ngaih thu an sawi a, "Pu Robert Romawia'n MNF sorkar hnua leiba pung anga Congress leh ZPM-te'n an sawi ṭhin dik lohzia RBI official statement hmanga a rawn puang chhuak a, MNF-in sorkarna a chan aṭanga sorkar leiba percentage a tlakhniam dan RBI figure a rawn tarlang khan mipui kawng dikah a kaihruai a, lawmawm kan ti tak zet a ni," an ti.