KHAWTHLIR

Thisen pe
March 26, Inrinni khan pawl pangain thisen an pe. KṬP, Bungkawn Bialin Civil Hospital, Aizawl tan thisen unit 90 an pe a, petute mipa 64 leh hmeichhia 26 an ni a; KṬP, Edenthar Veng Branch-in an din champha pualin Synod Hospital tan unit 28 an pe a, petute mipa 24 leh hmeichhia pali an ni. ṬKP, Thenzawl Bialin ZMC tan pein, mipa 38 leh hmeichhia 15-in unit 53 an pe a, ṬKP, Siaha East Bialin District Hospital tan unit 26 pein, mipa 21 leh hmeichhia panga an ni a; ṬKP, Lawngtlai Bazar unit member mipa 14 leh hmeichhia palite'n District Hospital tan unit 18 an pe bawk.

SVEEP inzirtirna
Nehru Yuva Kendra, Lunglei leh Lunglei District Football Association chuan March 26, Inrinni khan Systematic Voters Education and Electoral Participation (SVEEP) hnuaiah Lunglei District Election Officer bultumin Bethesda Futsal Ground-ah SVEEP One Day Futsal Tournament an buatsaih a; vote thlak pawimawhna an zirtir nghal a ni.

Tuizem sem
Sangau-II VC-in pawisa an khâwl hmanga tuizém (Sintex litre 1,000 dawng) 35 an lei chu March 26, Inrinni khan an huam chhunga tuizem ṭha nei lo chhungkaw 35 hnenah an hlân. Tuizem semna inkhawm hi Sangau-II khelmualah hman a ni a, VC president F Lalsangzela chuan, tuizem chu chhungkaw dangte hnenah pawh pek zel tum a nih thu a sawi.

Police-in meth man
Zawlnuam Police Outpost and Kanhmun Police Checkgate-a duty police-te chuan March 25, 2022 chawhnu khan Kanhmunah truck TR-01 AD-1869 aṭangin methamphetamine mûm 50,000 an man. Meth an man hi international market-a cheng nuai 150 hû a ni.

Lehkhabu tlangzarh
March 26, Inrinni khan BCM Hall, Serkawnah Familia Fanai Laltlansanga lehkhabu ziah 'Khuannu samsuih Ṭialpari leh Dopawrha' tih lehkhabu BCM general secretary Rev. F Ramdinmawia'n a tlangzarh.