Mizoram inthlanah vote 80.15% a tla Azasora-ah vote thlak nawn mai thei
Mizoram State Legislative Assembly inthlanpui vawi 8-na, November 28, Nilainia neih takah Mizoram pumah vote 80.15% a tla. EVM leh VVPAT thlak ngai a awm avang nual avangin hmun eng emaw zatah hun tiam chhungin vote thlak zawh hman a ni lo a, Tuichawng constituency-a Azasora polling station-ah chuan vote thlak zawh hman a nih loh avangin vote thlak ṭhat a ni mai thei nia thu dawn a ni.
Election department tarlan danin, Mizoram inthlanpuiah hian Mizoram pumah vote 80.15% a tla a; hriat theih chinah Aizawl South-III leh West Tuipui bialah vote tla ṭha berin, 87% ve ve a tla, Aizawl North-III bialah 66% tlain, vote tlak chhiatna ber bial nia hriat a ni.
Vote thlakna atana hman electronic voting machine (EVM) leh voter verifiable paper trial audit (VVPAT)-te chu nimin khan an awmna district headquarters thlenpui kim a ni a, vote chhiarna tura strong room-ah dah luh nghal niin, sipaite'n uluk takin chhun-zan zawmin an véng.
Vote tla percentage 80.15 ah hian service voters leh postal ballot hmanga vote tlate chhiar tel a ni loa, hei ai hian vote tla percentage hi a la sang dawn.
Mizoram Election department hotute hnen aṭanga Vanglaini thu dawn danin, Azasora-ah hian vote 50 vel a tlak hnuah electronic voting machine (EVM) leh voter verifiable paper trial audit (VVPAT) chiangkuan loh avangin vote thlak zui theih a ni lo. Eng emaw thulha EVM leh VVPAT thlakna tura ruahman hmangin EVM leh VVPAT-te chu thlak tum ni mah se, hman theih lohin a awm ve leh a ni.
EVM leh VVPAT inrin lâwk hman theih a nih loh avang hian hmun dang aṭangin EVM leh VVPAT lak a ni a, vote thlak theiha peih a nih chuan chawhnu dar 2 a ri tawh. Zan dar 12 thleng vote thlak a ni a, chumi hnu lamah chuan EVM leh VVPAT hman zui theih a nih loh avangin vote thlak zui theih a ni lo.
Azasora khuaah hian voter mi 1,080 an awm a, electoral roll aṭanga chhût chuan mi 300 chuangin vote an thlak hman lo. Election department hotute chuan, vote thlak hman lote vote thlaktir leh turin Election Commission of India-ah dil an tum thu Vanglaini an hrilh.