PIL hnûkdâwk, election petition thehluh tum

Lunglei All NGO Coordination Committee-in Lunglei district-a electoral roll-ah dan loin Bru eng emaw zat thun a nia an hriat avanga an ukil kaltlanga Gauhati High Court, Aizawl Bench-a writ petition (public interest litigation) an thehluh chu an hnûkdâwk a; remchang hmasaah election petition thehluh an tum.

NGO Coordination Committee chuan, dan lo leh hearing mumal nei loa Lunglei district electoral roll-ah Tripura-a awm mek Bru mi 203-te thun an nih avangin Gauhati High Court, Mizoram Bench-ah November 21, 2018 khan writ petition (PIL) an thehlut a; November 19, 2018 khan Lunglei DC leh District Election Officer pisa tualah electoral roll copy an lo hâl tawh bawk.

Bru mi 203-te electoral roll-a thun belhna hi Second Supple­mentary Electoral Roll tih a ni a, Bru-te chu Bru Repatriation and Iden­tification Slip hmanga thun a ni.

Lunglei NGO-te ukil hnen aṭanga thu dawn danin, High Court chuan PIL an thehluhna chu election petition thehluhna chi zawk tia a ràwn angin, NGO-te ukil chuan PIL thehluh tawh chu hnuhdawh a dil a, November 26 khan High Court chuan a phalsak. NGO-te ukil chuan, election petition chu inthlan vote thlak zawhah thehluh an tum thu Vanglaini palai a hrilh.

Hetih lai hian, Kolasib All NGO Coordination Committee-in Kolasib DC Dr Arun T-a'n hearing pawh nei loin mi eng emaw zat Kolasib district electoral roll-ah a thun nia an hriat vanga High Court-a PIL an thehluh pawh hnuhdawh a, election petition thehluh an tum ve bawk nia thu dawn a ni.