KHAWTHLIR

Hmeichhe Ni
Vawiin, November 30 hi Mizoram Presbyterian-a Kohhran Hmeichhe Ni a ni a, thupui chu "Zirtirtu ṭha - Nute' tih niin Dr T Vanlaltlani, ATC ziah a ni. Kohhran Hmeichhe Ni hi pastor bial leh kohhran hrang hrangah an remchan angin an hmang dawn a; kohhran ṭhenkhatah chuan ruai nen an lawm dawn a ni. Kohhran Hmeichhe Ni hi kum 1997-a hman ṭan a ni a, kumin hi a vawi 22-na a ni.

IAVA symposium
Indian Association of Veterinary Anatomists (IAVA) chuan November 28 aṭang khan College of Veterinary Sciences & AH (CVScAH), Central Agricultural University (CAU) auditorium-ah 'Veterinary Anatomy from Novices to Experts: Supporting Development of Professional Skill in Doubling Farmers Income' tih thupuia hmangin, XXXIII Annual Convention & National Symposium 2018 an buatsaih a, state hrang hrang aṭangin scientist leh post graduate 200 vel an tel.

SIPMIU office sawn
SIPMIU, Aizawl chuan November 26, 2018 aṭang khan Laipuitlang aṭangin New Secretariat Complex-a Union Resource Center - UDPA department building thar, Anti Corruption Bureau building epah pisa an sawn.

Nuar dawn
Mizorama BSNL-a thawkte chuan December 3, 2018 aṭanga All Unions & Association of BSNL-in tiam chin awm loa nawrh an huaihawt tur an thlawp dawn tih an puang a; bill pe duhte inhmakhua lâwk turin an ngen. BSNL-a thawkte hian hlawh ennawn te, pension ennawn leh thil dangte an phût a ni.

Buaina awm lo
Mizoram DGP Balaji Srivastava chuan Vanglaini palai zawhna chhangin, Mizoram inthlanpui neih takah dan leh thupek kenkawh kawngah buaina a awm loh thu a sawi a, "Dan leh thupek kenkawhnaah buaina a awm lohna atan theihtawp kan chhuah a ni," a ti. Tun ṭum inthlanah hian Mizoram Police-te bakah, central armed police force (CAPF) company 40-te dan leh thupek kenkawh hna an thawk a, state leh ram ṭhenawm aṭanga buaina siam tur an lo luh lohna atan ramrite pawh ngawrh taka venhim a ni.