ZPM-in inthlanah lawmthu an sawi

Zoram Peoples' Movement (ZPM) chuan thuchhuah siamin, Mizoram Legislative Assembly General Election vawi riatna, November 28, 2018-a a boruak muanawm tak hnuaia neih a ni chu lawmawm an tih thu an tarlang.

ZPM chuan, inthlanna muanawm leh rálmuang a awm theih chhan chu Mizo mipui lungrualna leh dikna duh vang a ni tih sawiin, "MPF hmalakna a fakawmin mipuite'n kan ṭawiawm ṭha hle tih a lang a, a lawmawm hle. Mizoram páwn aṭanga hnam dang, a bikin chanchin thar la khawmtu leh thehdarhtu, kan inthlan bêlchiangtute thusawi leh an thuziakte ngaihthlak a nuam a, Mizote chu inthlang thiam, muanna duhtu leh therhlo chelek tam lo nia min hmu hi a lawmawm tak zet a ni," an ti.

Kumin Mizoram inthlanah vote 80% vel a vote chu lawmawm an tih thu sawiin ZPM chuan, "Mipuite'n kan aiawh tur thlang tura vote thlak hlutna kan hre zel niin a lang," an ti a; hun lo kal leh zel turah, vote hlutna leh pawimawhna hre chiang zel a, tun aia tam zawkin vote thlak se an duh thu an sawi.

ZPM chuan, ZPM-a rinna leh beiseina nei chunga vote petute chungah lawmthu an sawi a, "Party politics dahṭhaa kan ram leh hnam kal zelna tur ngaihtuah a, puanven sâwi chhíng sauh sauh turin Mizoram chhung leh páwna Zo hnahthlak zawng zawngte kan sawmin kan ngen tak meuh che u a ni," an ti.

Vote leina atana sum chelek a la reh lo pawi an tih thu tarlangin ZPM chuan, "Mah se, mipuite'n sum chelek an ngai nep tawh hle tih leh Mizote hi ran ang mai maia lei theih kan ni lo tih tarlana a awm erawh hi lawmawm kan ti hle," a ti a, inthlan lo awm leh turah chuan sum hmanga inlei tumna a bo hlen tawh ngei an beisei thu an tarlang.