Mipui tana buatsaih news media-te chu Party organ nen a inang tur a ni lo - CM

Information & Public Relation (IPR) department chuan nimin khan an directorate auditorium-ah an kum 50-na, golden jubilee an lawm. Khuallian chief minister Zoramthanga chuan, mipui tana buatsaih news media-te chu party ogran-te nen a inang tur a ni lo tih a sawi.

Chief Minister chuan, media a ṭhan zel thu sawiin, "Khawvelin a chhe lam leh a ṭha lamin an hmang mek a, a hmang thiam apiang an vannei. Kan hmanraw neih hi a ṭha lo zawnga kan hman chuan keimahni a ṭha lo záwngin min nghawng dawn. Scientific thiamna lamah pawh hmasawnna a awm zel a, hengte hi thiamna min petu tan kan hman thiam a pawimawh," a ti.

Kohhran leh political party-te'n tum neiin news media an neih ve ṭhin thu sawiin CM Zorama chuan, "An âwn lam an tihlan pawhin mipuiin àwm an ti. Mipui tana buatsaih news media nen a kalphung a inang thei lo. Mipui tana buatsaih chuan kalphung pangngai a nei a, a one sided tur a ni lo," a ti a; mipui tana buatsaih news media, ṭan lam nei lutuka kal chu a zahawm lo a, a tlo theih loh thu a sawi.

Chief Minister chuan, Covid-19 avangin khawvelin harsatna a tawh thu sawiin, "Development kan sawi hman lo, inrenchemna kalpui ang aw kan ti. A bik takin India leh Mizoramin kan tum chu dam khawchhuah a ni. Khawvel a pangngaiin a kal chho ṭan a, financial year tharah chuan mamawh zualpui kan inphuhrûk theih a rinawm," a ti.

Covid-19 hripuiin khawvel a nuai nasatzia sawiin Zoramthanga chuan, "Kum 10 kal taah khan Covid-19 avanga kan awm dan tur miin sawi lâwk se la, tun ang medical facility ṭhat tawhnaah suangtuahna a rapthlak thei ang bera sawiah kan puh ang," a ti a; rambuai lai curfew pui anga kum khat dawn kal a nite chu thil mak a nih thu a sawi.

Khualzahawm IPR minister Lalruatkima pawhin thu sawiin, IPR department hnathawh hrang hrang a sawi a, "IPR department a chak loh chuan sorkar a chak tak tak thei lo tih kan hriat nawn fo a ṭul," a ti.

Lalruatkima chuan, information techno­logy leh social media a chak tawh thu sawiin, "Covid-19 chungchangahte rin tur leh rin loh tur hriatthiam a har cháng a awm fo a, mipui an chî-âi ṭhin. Chu'ngahte chuan IPR department-in an mawhphurhna an hlen," a ti a, mipuiin IPR department thuchhuak lo chu rintlakah an ngaih loh thu a sawi.

IPR golden jubilee lawmna inkhawm kaihruaitu IPR director Lallianpuii tarlan danin, IPR department-ah hian post 210 awmah post 110 a ruak mek a; Mizoram Information Service bikah post 48 a awm a, post 19 hnawhkhah niin, post ruak 29 a awm a ni.