KṬP inkhawmpui lianah Kolasib district Páwn lam mite swab sample endik dawn

Kolasib district bawrhsap Dr H Lalthlangliana chuan May 5-8, 2022 chhunga Kolasib Diakkawn Field-a KṬP General Conference neih turah hriat tur pawimawhte a tichhuak a; Kolasib district páwn lam aṭanga riak luta kal tur zawng zawng chu Rapid Antigen Test (RAT) hmangin swab sample endik vek tur a nih thu a tarlang.

Dr H Lalthlangliana chuan, Covid-19 hripui laka him nan khauh taka ruahmanna kenkawh tur a nih thu tarlang­in, Covid-19 symptom neite chu inkhawmpuiah kal lo turin a chah a, "Kolasib district páwn aṭanga riak luta kal tur zawng zawngte RAT hmang­in Kolasib khaw dáiah Covid-19 test neih vek tur a ni," a ti a; RAT hmanga sample endikna chu Khuangpuilam (Hmangkhawthlir) leh Tuiṭha Vengah buatsaih a nih dawn thu a tarlang a ni.

A hmaa lo sawi lan tawh, mimal ina inthlentir lo a, hall remchanga inthlentir tura ruahmanna siam chu sût a ni a; mimal inah thlen phal a ni dawn a, chutih rualin, in pakhatah tâwt lutuka inthlentir a nih loh nan ruahmanna siam tur a ni thung.

INKHAWMPUIA TEL TURTE HRIAT TUR
1) Kolasib Chief Medical Officer-in swab test neih dan tur leh endikna hmun buatsaih chungchangah ruahmanna a siam ang. Hemi atan hian a ṭul anga pui turin Organising Committee-a Reception Sub-Committee ngen an ni.
2) Covid-19 vaccine full dose la tawh, second dose an lak aṭanga ni 15 liam tawh leh, sorkar hriatpui laboratory aṭanga Covid-19 negative certificate nei (test aṭanga darkar 48 aia rei lo) neite chu swab test a ngai lo ang.
3) Covid-19 negative certificate nei chuan duty-te endik theih turin inrin lâwk ni se.
4) Mimal ina thlen phal a ni a, amaherawhchu, in pakhatah tâwt lutuka mikhual/palai an thlen lohna turin ruahhmanna siam tur a ni.
5) Pandal bul hnai hmun remchang laiah kut silna siam tur a ni a, hand sanitiser chhawp tur a ni bawk.
6) Palaite'n a theih chin chinah hand sanitiser pài/ken tur.
7) Hmai tuamna ṭha takin hman vek tur a ni.
8) Mi dang nen inhlata awm hram tur a ni a, kut tihfai ngaih pawimawh tur a ni.