Corruption leh induhsakna uchuakte a tak taka do a ngai - Dr Vanlalthlana

ZPM Legislature Party secretary Dr Vanlalthlana chuan nimin khan ZPM party pisaa inkhawmah thu sawiin, corruption leh induhsakna uchuakte chu a tak taka do a ngaih thu a sawi.

Dr Vanlalthlana chuan, "Corruption leh induhsakna uchuak hi a tak taka kan do a ngai. Corruption leh induhsakna uchuak natna kan vei mek avang hian beidawng tur kan ni lo a, chutiang tih chíngte kutah chuan thuneihna kan dah loh ngam a ngai. He natna do lêt thei dinhmuna kan din lai hian theihtawp chhuaha do turin Zoram mipui ka sáwm a ni," a ti.

Mizoramah dikna duhtu mi ṭha tam tak an awm tih sawiin Vanlalthlana chuan, "Party bik sawi loin ram siamṭhat duh tak takna aṭang chauhin ram kan siamṭha ang," a ti a; corruption-in mi tin a nghawng tih sawiin, "Rethei ngai an rethei ngat ngat a, hausa an hausa tawlh tawlh thung. Kan ram hi vote hmangin kalphung thar sorkar hnuaiah siamṭhat theih a ni," tiin, mipuite chu khawi hmunah pawh ram an vei thei a, an au chhuak thei tih a sawi.

Dr Vanlalthlana chuan, Mizoram siam turin nasa lehzuala inpe thar tura mipui sáwmin, "Kan ram natnaah hian i na ve ang u," a ti a; ṭhalai zingah leh rual ú zawkte zingah ram siamṭhat vei tak tak, ram siamṭha tham an awm tih sawiin, "Ram siamṭhat duhtute hi kan inlungrual chuan kan chak tâwk a, pên chhuak ila, tun aṭangin i thawk ṭan ang u. Zoram natna zinga pawi ber chu corruption a ni a, corruption do ngam sorkar, dan bawhchhiate hrem ngam sorkar, kalphung thar sorkar kan din tur a ni," a ti.

Corruption an do ngam dawn lo a, dan bawhchhiate an hrem ngam dawn lo a nih chuan ZPM party-a awm reng chhan tur a awm lo tih sawiin Vanlalthlana chuan, "Zu doa thâ kan thawh ang tluk hian páwl tinte hi corruption doin thawk chhuak ila, ram siamṭhat bul ṭanna atan chu chu a pawimawh ber a ni," a ti bawk.