MNF sorkarah sorkar sikulah zirlai lak sên loh an awm - Education Minister

School Education minister Lalchhandama Ralte chuan, Congress sorkar laiin sorkar sikul a tlahniam a, mimal sikul an bawh nasa a, MNF sor­karah erawh chuan sorkar sikulah zirlai lak sên loh an awm tawh niin a sawi.

Nimina Mizo Hnam Rûna inkhawmah Lal­chhandama Ralte chuan, mipui tan 'free education' an buatsaih avangin mipui thinlung a inthlâk a, sorkar sikulah rinna an nghat nia sawiin, "Sorkar hmasaah khan sorkar sikul a tlahniam duai duai a, private sikul an bawh nasa a nih kha. Kan sorkar kum thum chhung hian sorkar sikul khâr ai chuan tihpun belh zawngin hma kan la nasa a, tunah chuan sorkar sikulah admit sên loh kan nei ta," a ti.

Education Minister chuan, kum 2023 acade­mic session tharah pri­mary school, middle school leh high school-ah uniform inang vek hmang turin ruahmanna an siam tih sawiin, "Sikul dangah insawn mah se, hautak lo zawkin uniform a ngaia rin theih turin kan ti a ni," a ti a; Covid-19 léng vanga sorkar sum dinhmun a chhiat avangin sikul tihhmasawn hna an kalpui thei lo a, sum dinhmun a ziaawm veleh school upgrade turin hma an la mek niin a sawi.

Ṭhangtharteah Mizo nationalism tuh a nih theih nan hma an la nasa tih sawiin Minister chuan, "Pawl 6-8 zirlaiah 'Zonun' tih zirtirna kan telh. Science leh mathematics-ah pawh English hlirin kan inzirtir ṭhin a, academic session tharah chuan pawl 10-12-ah Mizo ṭawnga hriat fiah awlsam turin ruahmanna kan kalpui a ni," a ti.

Lalchhandama Ralte chuan, Mizo hnam hlaa ngaih 'Aw nang kan Lal kan Pathian' tih hla chu Mizo hnam thinlunga a reh lohna turin sikul zawng zawngah saktir tum a nih thu te, Chief Minister leh Deputy CM thilphalna azarah principal leh headmaster-ah mi 500 chuangin promotion an hmuh tawh thu te, School Education department chu Covid-19 tuar ber an nih thute a sawi bawk.