KHAWTHLIR

Thisen pe
Nimin khan Civil Hospital, Aizawl blood bank tan PYD Bazar Bialte'n thisen unit 62 an pe a, petute mipa 47 leh hmeichhia 15 an ni. Pachhunga University College NSS pawhin thisen unit 13 an pe a, petute mipa 10 leh hmeichhia pathum an ni a; mimala thisen pe (individual voluntary donor) mi pasarih an awm bawk.

Green Champion
Siaha district bawrhsap Lalsangliana chuan nimin khan a pisaah Saiha College principal Prof. Abdul Hanna Barbhuiya hnenah District Green Champion certificate leh Rs 5,000 a hlân.

Mizo webinar
Mizoram University-a Department of Mizo leh Mizo Literature and Language Teachers’ Academy (MILLTA) chuan March 21-25, 2022 chhung khan zan tin 'Mizo subject leh a kaihhnawih’ tih thupui hmangin webinar an buatsaih. Webinar-ah hian university leh college-a Mizo subject zirtirtu 80-te'n thupui chi hrang hrang an sawiho a ni.

Scooty chesualah thi
March 27, Pathianni tlai dar 5 vel khan Kulikawna scooty chesualah a hnunga chuang Ngurmuanpuii (26) w/o Lalṭhasangzela (28), Melriat a thi a, scooty khalhtu Lalṭhasangzela na takin a hliam bawk. Thu dawn danin, scooty hi a hmaa tlân tanker a tlàn pelh dawn laiin a chesual a, tanker hnuaiah a inbarh lut a ni. Lalṭhasangzela hi Civil Hospital, Aizawlah enkawl mek a ni a, an fate pahnih - kum 2 mi leh thla 9 mi erawh an hliam na lo thung.

Induction Course
March 28 aṭanga April 1, 2022 thlenga Aizawl SP conference hall-a neih tur Aviation Security Induction Course chu nimin khan ṭan niin, DIG (CID) Lalhuliana Fanai-in a hawng. Training-ah hian Mizoram police mi 37 an tel a, Air India-a Kolkatta senior manager (security) MK Chaudhury leh Chennai security officer Geetha Govindhan ten thil pawimawhte an zirtir dawn a ni.