Minister-in thlai chî leh hmanrua a sem

Mission Foundation Movement (MFM) hnuaia Thingsulthliah RD block-a Organic Farming for Sustainable Agriculture Production Project-in a huamte hnenah nimin khan thlai chî leh hmanrua chi hrang hrang sem a ni a, minister R Lalzirliana'n a hmanpui.

R Lalzirliana chuan, Mizoramah mithiam tam tak an chawr chhuak a, sorkar laipuia ministry hrang hrangte dàwr tur leh hmasawnna atana sum mamawhte paw chhuak turin firm eng emaw zat din a ni tawh tih a sawi a, "Amaherawhchu, firm-te hian an tum ber chu mahin inhai vûr hmasak a nih fo avangin a nih tur angin project kalpui a ni lo fo. Chutiang ni loa mahni inhai vûr tur ni lo Zoram kal siam tura MFM hmalakna a fakawm tak zet a ni," a ti.

Ramngaw ṭhiah nasat vangin Mizoram boruak a inthlak nasa tawh hle tih sawiin R Lalzirliana chuan, "Organic farming hi khawvelin a buaipui mek a, ram changkang leh mi hausate'n organic product an ngai hluin an ngaisang mek. Hetih rual hian, chemical fertiliser-te hmun hrang hrangah hman a nih tawh ṭhin avang leh lui tui luangte'n fertiliser-te a ken darh ṭhin bawk avangin organic farming kalpuina tur hmun thlan fimkhur a ṭul," a ti a; organic certificate an neih ngei theih nan dikna ngai pawimawh turin kal khawmte a chah.

Organic Farming for Sustainable Agriculture Production Project hi central sector scheme a ni a, sum mamawh zawng zawng sorkar laipuiin tumin, Thingsulthliah RD Block leh Reiek RD block-ah kalpui mek a ni.

Thingsulthliah RD block-a khaw pasarih aṭangin mi 75 thlan a ni a, a thawh khatnaah thlai chi hrang hrang - sweet corn, bê, vaimin leh bawrhsaiabê bakah, bawngtuthlawh, suahdúr, tui pipe, chem leh Rs 3,000 ṭheuh pek an ni.