April 20, 2022 hma ngeiin ration card leh Aadhaar Card thlunzawm tur a ni

Food, Civil Supplies & Consumer Affairs (FCSCA) department chuan sorkar laipui aṭanga thupek an dawn bawhzuiin ration card leh Aadhaar card la thlunzawm lote chu April 20, 2022 ral hma a thlunzawm vek turin a hriattir.

FCSCA dept. tarlan danin, The Mizoram Food Security Rules, 2015 duh dan angin Targeted Public Distribution System (TPDS) hnuaia beneficiary-te hi ration card nei tur chuan Aadhaar an neih a ngai. Tin, Ration Card Management System (RCMS) ah hian Aadhaar tel loin ration card a pek chhuah theih loh avangin department chuan kawng hrang hrangin mipuite hnenah ration card leh Aadhaar thlunzawm a ṭul thu hriattirna a lo chhuah tawh ṭhin a ni.

Amaherawhchu, Covid-19 hripui avanga nunphung nasa taka a khaihlak avang leh tum anga chet lak a harsat avangin, tun thleng hian ration card leh Aadhaar thlunzawm lote pawhin ration an chan lohna’n special allotment-te siamsakin ePoS hmang loin ration pek ṭhin an ni. He kalphung hi sorkar laipui thupek kalh anih avangin hetianga ePoS kaltlang loa (manual) ration inpek reng hi a remchang tawh loa, sorkar laipui chuan thupekte khauh taka kengkawh turin state sorkar a hriattir tawh a ni.

TPDS Control Order, 2015 chuan electronic platform (ePoS device leh digital weighing scale) chauh hmangin retailer (FPS dealers) te’n TPDS beneficiary te hnenah ration an sem ṭhin tur a ni a tih laiin Aadhaar leh ration card thlunzawm lote tan ePoS device hmangin ration a lak theih loh. Chuvangin, Aadhaar leh ration card la thlunzawm lote chuan ni April 20, 2022 ral hma ngeiin an thlunzawm vek tur a ni a, thlunzawm ve lote hnenah May, 2022 aṭanga an thlunzawm hma chu ration pek an ni tawh dawn lo.