Social Welfare Minister-in Observation Home leh OSC hawng

Social Welfare minister Dr K Beichhua chuan nimin khan Lunglei Pûkpuiah Ministry of Women and Child Development (WCD) kaltlanga ruahman, Lunglei Observation Home & Lunglei Special Home leh Serkawnah One Stop Centre a hawng.

Hawnna inkhawm hi WCD joint director Zoramthangi Chhangte-in a kaihruai a; Dr K Beichhua chuan, ram leh hnam hmasawnna turin naupang leh ṭhalaite zirtirna ṭha pek a pawimawh thu sawiin, "Hmasawnna daih rei leh tlo nei turin zirna lama hmasawn hi thil pawimawh hmasa berte zing a mi a ni a, naupangte leh ṭhalaite zirtirna ṭha leh dik kan pe em tih kan inennawn fo a ṭul," a ti a; naupang zirtir, venhim leh enkawl ngaite hamṭhatna ngaihtuahnaah theihtawpa hma la turin mipui a sáwm.

Lunglei Observation Home & Lunglei Special Home hi cheng nuai 422.72 sénga sak niin, Lushai Engineers-in an sa a; Juvenile Justice (Care and Protection of Children) Act, 2015 Section 41 hnuaia ziah luh niin, naupang 50 (mipa 40 leh hmeichhia 10) lenna tura ruahman a ni.

Serkawna One Stop Centre (OSC) chu Baptist Church of Mizoram (BCM) leh Social Welfare department-te hmalaknaa sak a ni a, a hmun hi BCM-in ram a hman hawhtir a ni. Hmeichhia harsatna tâwk, pawngsual, social media-a intihhmingchhiatna/social media kaltlanga harsatna tâwk te, hmeichhe rûk bo, thuam chhawm/bungraw inchuh leh khawtlangah emaw inchhung khurah emaw harsatna nei tan pan theih a ni.

OSC hi hmeichhia kum 18 chin chung lam bakah, fapa kum riat hnuai lam leh hmeichhia kum bithliah awm lo neite tan ni nga chhung awm theihna a ni a; a ṭul anga damdawi pek, police-a FIR thehluh, DIR buaipui, psychological/legal counselling leh, dan leh hrai chungchanga ṭanpui an ngaihna apianga inpuihna tur a ni.